Gahom sa pagpaningil

Maayo ra sab nga namilok ang Malacañang. Imbes magpaugat pagboykot sa imbestigasyon sa Senado sa pagdakop ni kanhi presidente Rodrigo Duterte. Kay wala silay kalainan ni kanhi presidente Gloria Macapagal Arroyo nga natarantar sa “Hello, Garci” scandal ug ni kanhi presidente Rodrigo Duterte nga nasakpan sa Pharmally scandal.

Walay rason ang administrasyon ni Presidente Ferdinand Marcos Jr. nga magtago. Bisan unsa pay ipabuhagay nga pakauwaw sa iyang kaugalingong maguwang nga si Senador Imee Marcos. Kay silay nagkupot sa tinuod nga alas: Napriso ug wala nay makapagawas ni Duterte sa The Hague.

Labing dakong tsamba nga ma-iskor ni Imee mao ra ang pagmatuod nga, sukwahi sa pagpaka aron ingnon sa iyang manghod, ang administrasyon nitabang sa mga imbestigador sa International Criminal Court (ICC). Nga palusot ra ang pangangkon nga dili silang kabalibad sa International Criminal Police Organization (Interpol).

Nga dili makadaot sa Malacañang. Makapahumot hinuon nila ngadto sa kanasuran nga nagsalig sa international law nga makatabang pagbadlong sa bangis nga mga krimen ug pagpalambo sa kalibotanong kalinaw. Labi na kon ibisto sa manghod ang iyang baraha ug mobalik pagpasilong sa ICC.

Ang paghungaw sa mga protesta nga gipaburot sa trolls sa mga Duterte momatuod sa resulta sa surveys sa Social Weather Stations (SWS) pila ka semana sa wala pa matanggong si Duterte:

51% sa mga Pilipino (62% sa mga Sugbuanon ug mga Bisaya) ang uyon nga patubagon si Duterte sa extrajudicial killings (EJKs) sa iyang drug war; ug

25% na lang ang kumbinsido nga makaayo sa nasud ang iyang pag-ihaw sa kapin sa 30,000 ka mga biktima.

Makatabang sa Malacañang kon motambong si Bise Presidente Sara Duterte sa public hearing sa Senado ugma. Aron pagpakita sa iyang naandan nga kahawod. Pinaagi sa pagbalik sa pasangil nga gidagit ang iyang amahan ug bugo ang abogado sa ICC kay walay lista sa tanang mga biktima sa EJKs.

Aron matawag ang atensiyon sa publiko sa lista sa pekeng mga ngalan nga nakadawat sa iyang confidential funds. Hinaot nga ang pagkapriso sa amahan ug nag-ung-ong nga pagkakonbikto sa anak, makapahinumdom sa katawhan nga walay makapugong sa ilang gahom pagpaningil sab sa manghod ug maguwang sa ilegal nilang katigayonan.