Umapad gikoronahang overall champion sa 1st Ouano-Dizon Congressional Cup

CEBU, Philippines — Ang Barangay Umapad maoy gibayaw nga overall champion sa bag-ohay pang natapos nga 1st Mandaue Ouano-Dizon Congressional Cup (ODCC) Basketball and Volleyball Tournaments nga gisalmotan sa 1,800 ka mga atleta gikan sa 27 ka mga barangay sa dakbayan.

Usa dayon ka maanindot nga balita ang miabot sa mga Mandauehanons tungod kay sa pormal nga awarding ceremony, si Mandaue City Lone District Representative Emmarie “Lolypop” Ouano-Dizon nga maoy nagpasiugda sa maong kalihukan misaad og mas dako ug mas nindot nga torneyo sunod tuig.

“Extraordinary things await us. And we are just getting started. See you next season,” matud pa ni  Ouano-Dizon ngadto sa bagang bul-og sa mga tawo nga nagdasok didto sa Barangay Opao gymnasium.   

“Sa atong pagpasiugda sa what is now the biggest sports event of the year dinhi sa dakbayan sa Mandaue, my heart is filled with so much happiness and pride, that Mandauehanons were given the chance to experience the thrill, the excitement, the grace in defeat, and the humility in victory."

"Most important of all, the ODCC has given us a chance to show our unity, our sportsmanship, our teamwork. Pinaagi sa ODCC, napakita nato that everything is possible with hardwork,” dugang pa niya. Si Ouano-Dizon nagpasalamat sa tanan nga nakatampo sa naglagiting nga kalamposan sa mahinungdanon nilang kalihukan.

Sa laing bahin, ang Umapad volleyball team gikoronahang kampiyon sa women’s category ug first runner-up sa men's class.

Si Dyan Darantinao gipasidunggan nga Most Valuable Player, si Cherry Sumayang ang Best Setter, si Pamela Sumayang ang Beat Libero, si Rochelle Rica Son ang Best Server, ug si Janelle Cabahug ang Best Open Hitter.

Ang mga pambato sa Tipolo nga sila si Rhea Fuentes ug Mary Grace Melendres maoy Best Opposite Hitter ug Best Blocker. Ang ubang individual awardees sa Umapad sa men's mao sila si Royet Varga isip Best Setter ug Jewel Cabahug isip Best Server.

Si Rafols Sico sa Opao ang miangkon sa tropeyo isip MPV samtang ang iyang mga teammates nga sila si Joseph Tejamo ug Mark Lagaran gipasidunggan nga Best libero ug Best Blocker. Sila si Menard de la Cerna ug Ruco Academia sa Guizo maoy Best Open Hitter ug Beat Opposite Hitter.

Sa basketball, ang Umapad nalandig sa ikaduhang puwesto sa juniors division. Si Joseph Lambayan naapil  sa Mythical Five. Ang ubang kampiyon sa basketball ug MVPs mao ang agsabungan/Rey Judilla (40-above), Casuntingan/Peter John Peteros (juniors), ug Paknaan/James Villafuerte (seniors).

Ang Mythical Five naglangkob nilang Judilla, Jaypee Alejandro sa Subangdaku, Aladin Aguilar sa Tabok, Jessie Tano sa Paknaan ug Retchie Cesa sa Cubacub sa 40-above, Peteros, Lambayan, BJ Manatad sa Labogon, Jerome Doña sa Centro, ug Kurt Cintore Ramil sa Cabancalan sa juniors, ug Villafuerte, Kent Gato sa Pagsabungan, Vincent Lequin sa Opao, John Paul Dugenio sa Tabok, ug Joseph Mañago sa Centro sa seniors.