Hiyasmin (163)

Nagpasya na si Hiyasmin na ipagtapat ang sinabi ng nanay ni Dax.

“Sinabi mo pala kay Nanay na natutulog ako na naka-panty lang.’’

Napama-ang si Dax. Hindi agad nakasagot.

“Bakit sinabi mo pa sa kanya, Sir Dax.’’

“A e kuwan, para malaman niya at nang mapagsabihan ka.’’

“Nasabihan mo na naman ako di ba? Hindi na nga ako natutulog na naka-panty—naka-pajama na ako lagi.’’

“Sorry, Hiyasmin. Akala ko kasi, hindi na sasabihin ni Nanay yun. Hindi na mauulit.”

“Okey lang naman sa akin Sir Dax.’’

“Salamat.’’

“Yun lang naman ang napag-usapan namin.”

“Wala nang iba?’’

“Oo.’’

“Kasi ang tagal ng pagkukuwentuhan n’yo.’’

“Marami kasing sinabi sa akin. Pati yung pasalubong niyang kakanin ay ikinuwento kung paano niya nadiskubreng lutuin.’’

“Magkasundung-magkasundo talaga kayo ng nanay ko.’’

“Mabait kasi siya sa akin.’’

“Baka gusto ka niyang maging manugang?’’

Napatingin nang makahulugan si Hiyasmin kay Dax. Nahihiwagaan na naman siya sa mga sinasabi nito. Ano kayang ibig sabihin nun?

(Itutuloy)