Halimuyak ni Aya (284)

KUMAIN si Aya nang dalang pagkain ni Sam. Habang kumakain, nakamasid si Sam.

‘‘Paborito mo yang paa at hita ng manok di ba kaya yan ang binili ko. Naisip ko kasi, baka gutom na gutom ka na.’’

“Gutom nga ako.’’

‘‘Kagabi saan ka kumain?’’

“Wala.’’

“Nagtiis ka ng gutom?’’

“Oo.’’

“Maniwala ako.’’

“Hindi nga ako kumain.’’

Tameme si Sam.

‘‘E bakit wala ka kagabi rito?’’

‘‘Narito ako.’’

‘‘Nagpunta ako rito pero wala ka.’’

‘‘Narito ako.’’

“Wala ka. Sumilip ako.’’

“Nasa banyo ako.’’

“Alam mong duma-ting ako?’’

‘‘Oo.’’

“Ba’t di ka sumagot?’’

“Siyempre nagpapakipot.’’

“Ang arte nito.’’

‘‘E ikaw sumponge-ro. Basta mo na lang akong sinusumpungan. Bakit ba nagalit ka?’’

“Wala. Kalimutan mo na yun. Mainit lang ang kukote ko.’’

‘‘Dahil kay TJ ano?’’

‘‘Hindi. Bakit naman ako magagalit dahil dun?’’

‘‘E siya lang naman ang taong narito kahapon. At saka wala namang dahilan para ka mainis sa akin. Ano ngang dahilan at nainis ka Samuel?’’

‘‘Wala nga, kulit!’’

‘‘Si TJ nga siguro ang dahilan. Ikaw din ang nagsalya ng pinto kahapon ano?’’

‘‘Hindi ah. Lahat na lang binintang mo.’’

Nagtawa si Aya. Mun­ tik mahirinan.

“Ikukuha kita ng tubig. Tawa ka kasi nang tawa.’’

“Sige.’’

Kumuha ng tubig si Sam. Uminom si Aya.

‘‘Ikaw ba’t di ka kumakain?’’

“Busog ako.’’

“Bakit?’’

“Siguro’y dahil nasagutan ko lahat ang     exams ko.’’

‘‘Wow galing. Baka magna cum laude ka  pag-graduate.’’

“Sana.’’

‘‘Kaya mo yun.’’

“Akalain mo, pati subject ni Dra. Del Cruz, na-perfect ko.’’

Hindi nagsalita si Aya nang marinig ang pangalan ni Dra. Del Cruz na asawa ng kanyang papa. Nag-isip ito.

‘‘Ba’t parang nag-isip ka?’’

“Naisip ko lang si Papa. Ba’t kaya ayaw nang magpakita?’’

“Gusto mo, mag-imbestiga ako.’’

“Paano?’’

“Basta akong bahala.’’

ISANG araw, pag-katapos ng kanyang klase sa umaga, nagtungo si Sam sa clinic ni Dr. Paolo del Cruz. Pero nagulat siya dahil wala na raw doon si Dr. Del Cruz. (Itutuloy)