Iyon ang kuwento ng mga nakaraan ni Ate Lina. Masyadong masalimuot. Hindi ko akalain na ang nasa likod nang maganda niyang mukha at katawan ay isang pambihirang kuwento. Masyado nang maraming pinagdaanan si Ate Lina lalo na sa pag-ibig.
“Kapag sikat ka nang journalist e isulat mo ako ha Benhur,” sabi muli niya sa akin. Hindi ko alam kung bakit bigla niyang naisip ang ganun.
“Oo Ate Lina. Ikaw ang unang makakabasa ng gagawin kong kuwento.”
“Sige asahan ko ‘yan.”
“Nagtataka lang ako Ate Lina kung bakit ang binagsakan mong trabaho ay sa pagiging GRO gayung saleslady ka na sa isang malaking department store.”
“Sabi ko na nga ba’t hindi yun makakalusot sa’yo. Matalino ka talaga, Benhur.”
“Bakit ka nga ba nag-GRO?” “Mula kasi nang mangyari ang trahedya kina Cynthia at Raffy ay tila ba na-sira na rin ang mga pagpapasya ko sa buhay. Para bang nawalan ako ng direksiyon. Hanggang sa masumpungan ko na lamang na nag-aaplay sa isang sikat na club sa Quezon City. Natanggap naman agad ako. Maganda raw kasi ako.”
“Okey naman?”
“Oo. Nang tumagal lipat ako sa mas malaki at sikat na club. Hanggang ako ang maging “star” at laging inaabangan ng mga kalalakihan. Sumikat ang club na iyon dahil sa akin. Dinudumog.”
(Itutuloy)