(Kasaysayan ni M.R.A. ng Riyadh, KSA)
PALIHIM akong nakabantay sa mga nakasampay kong damit at underwear sa likod ng bahay. Gusto kong mahuli sa akto si Rashid habang kinukuha ang aking panty.
Dakong ala-una ay nakita ko ang pagbabalik ni Rashid. Hawak niya ang football at nilalaru-laro habang papasok sa gate. Hindi naman ako humihinga habang palihim na nakatingin sa kanya. Ganoon man, ako ang natatakot. Magawa ko kayang komprontahin ang tinedyer na ito habang nasa aktong kinukuha ang aking panty? Parang hindi ko kaya. Takot ako.
Pumasok na sa bahay si Rashid. Nasubaybayan ko siya ng tingin. Nakakubli ako sa madilim na bahagi ng bahay kaya hindi niya ako nakikita.
Nagtuloy sa kusina si Rashid. Maya-maya ay bumalik sa salas at pagkatapos ay sa comfort room na malapit lamang sa kusina. Matagal ito sa CR. Ano kayang ginawa? Kinakabahan ako.
Makalipas ang sampung minuto ay lumabas si Rashid. Dinampot ang football sa sopa at muling lumabas sa bahay. Kandahaba ang leeg ko at baka magderetso sa likod ng bahay at kukunin ang panty ko.
Pero hindi siya sa likod ng bahay nagpunta kundi sa gate at binuksan muli iyon. Lumabas uli ang sutil na tinedyer. Isinara ang gate. Hula ko ay may nag-aabang na mga kabarkada sa labas. Ganoon ang ginagawa ng barkada ni Rashid.
Nang inaakala kong hindi na babalik si Rashid ay lumabas na ako sa kinukublihan. Mabilis akong nagtungo sa likod ng bahay at kinuha ang aking mga sampay. Baka pagbalik ni Rashid ay saka nakawin ang panty ko.
Hindi ko nalaman kung anong oras bumalik si Rashid. Naunahan pa siyang dumating nina Sir at Madam galing sa trabaho. Hindi naman tinanong sa akin kung nasaan si Rashid.
Kinalimutan ko ang panty isyu at ang pagpapaalam muli sa aking mga moder ang pinlano ko. Babalik ako sa Biyernes sa church na malapit sa Shoula. Para makarinig ng salita ng Diyos. Sana ay naroon din si Dolfo.
(Itutuloy)