Mga milagro, aparisyon ug uban paSama ni Hesus gipas-an ni PRRD ang krus (Katapusang gula)

Makahuluganon kaayo kining nahitabo karon ni kanhi Presidente Rodrigo Duterte (PRRD), diin giunay siyag padakop sa kanhi mga tawong iyang gimahal-gitabangan, unya gitugyan pa gayod ngadto sa banyagang International Criminal Court (ICC) aron mao nay moimbestigar ug mosilot ingkasong mahukmang sad-an sa kasong gipasangil: crime against humanity tungod sa extra judicial killings sa kanhi niyang war on drugs.

Nakaingon kong makahuluganon, sanglit nasulod man ang adlaw sa pag-aresto kaniya, Marso 11, 2025, nga bulan sa Kuwaresma ug panahon natong mga Kristiyanos sa pagpamalandong sa Pasiyon ni Hesus aron lamang kitang tanang makasasala maluwas, diin sa wala pa Siya itugyan ngadto sa mga sundalong Hudeyo, gihagkan pa Siya ni Hudas, kinsa maoy miunay sa pagbaligya Kaniya.

Ang pamilyang Marcos, kinsa gitabangan ni PRRD nga malubong sa Libingan ng mga Bayani ang kanhi Pangulo Ferdinand E. Marcos Sr.; si Bongbong Marcos Jr, nga na-presidente tungod sa pagpakig-tandem kang Sara ‘Inday’ Duterte; ang mga kasundalohan-kapolisan, kinsa gidoble ang suweldo panahon ni PRRD; ug ang mga kongresista ug senadores, kinsa kaniadto grabe ka sipsip panahon sa paglingkod niya sa Malakanyang?

Pastilan mao pay nagtinabangay pagpangitag paagi nga matugyan ngadto sa mga dili kasaligang kamot sa langyawng ICC si PRRD, kinsa, tinuoray'ng nagmahal-nagpangga-nahigugma sa atong nasod ug natong katawhan!

Apan makagisig kasingkasing ang giresponde ni PRRD niining mga mapahimuslanon nga milatigo-mikastigo-midaogdaog kaniya, kinsa wala na motuman sa hustong proseso sa atong balaod ug  sa balaod sa ICC.  Kay inay sugniban ang nag-aso-aso nang kasuko sa milyonmilyong Pinoy nga maoy gisakitan sa iyang gidangatan, siya mihangyo-pugong: “Relaks lang! Kalma lang!” Lamang aron kapugngan ang dugoong pagsilaob.

Bisan, si CIDG Chief Torre III ug kapolisang midakop kaniya, iyang gipahinumdoman nga amigo ug mahal gihapon niya sila. Dili siya makabasol sa mga polis kay trabaho nila kini ug igo ra silang misunod sa sugo sa ilang labaw. Diin, silang tanan, amahanon niyang gilektiyuran sa unsay maayong buhaton diha sa pagpangalagad? Nga maoy nakapahilak sa pipila ka nanagdukong polis.

Ug sama ni Hesus, gipas-an ni PRRD ang krus nga gipapas-an kaniya sa kapolisan gikan dinhi sa Pilipinas paingon sa kalbaryo sa ICC, Netherlands. Nga gikahimuot sa mga anti-Duterte!