Ex-actor, timbog sa pagpatay sa kaibigan!
MANILA, Philippines — Dinakip ng mga tauhan ng Pasig City Police Station ang dating actor na si John Wayne Sace kaugnay sa pamamaril at pagpatay umano sa kanyang kaibigan kamakalawa sa nasabing lungsod.
Kinumpirma ng Eastern Police District (EPD) ang pag-aresto kay Sace na suspek sa pagpatay sa 43-anyos na lalaking inilarawang nakasuot ng t-shirt at shorts, may apat na tama ng bala sa katawan, na natagpuang nakahandusay sa tapat ng isang gate sa Barangay Sagad, Pasig City.
Sa inisyal na ulat, alas-7:30 ng gabi ng Oktubre 28, 2024 nang maganap ang insidente ng pamamaril sa Brgy. Sagad sa Pasig City.
Sa isinagawang follow-up operation, natunton ng mga pulis ang aktor sa isang hotel sa Pasig City, ilang oras lang matapos ang krimen.
Nagkaroon umano ng alitan ang magkaibigan na nauwi sa pamamaril.
Si John Wayne ay dating miyembro ng all-male dance group na Anime sa ASAP noong 2003 at gumanap sa iba’t-ibang role sa pelikula at telebisyon.
- Latest
