Mga timaan ni Quiboloy
Kon tinuod ang pangangkon sa iyang mga sakop nga wala si Apollo Quiboloy sa sulod sa 30 ka ektarya niya nga compound sa Davao City:
Wala unta sugata og water cannon ug barikada sa kababayen-an ug kabataan ang 100 ka polis nga nisuway pagdakop ni Quiboloy niadtong Hunyo 10, tulo ka buwan human luwati ang unang arrest warrants sa Senado ug House of Representatives batok niya; ug
Wala unta mag-barikada sa nasudnong highway duol sa compound nga nakabara sa sakyanan gikan ug padulong sa Davao International Airport ug ubang destinasyon.
* * *
Kon sayop ang kasayuran nga nahipos sa kapolisan nga si Quiboloy naa magtago sa bunker ilawom sa compound:
Wala unta maghago ang iyang mga sakop sa pakiglalis, pagtulisok, pagbalikas, pag-insulto, pagpalayas ug paglabay og mga bato ug pinutos nga mga hugaw sa mga polis nga ligdong nga nipatuman sa lehitimo nga sugo sa mga korte ug sa Kongreso; ug
Nangiyugpos lang unta sila, hilom nga nagkatawa ug nipaundayon sa pag-usik og oras sa mga polis kay nakaseguro nga si Quiboloy tua sa luwas nga lugar layo sa hulgang maposasan.
* * *
Kon nagpataka ang mga polis sa pagtuo nga mga pitik sa kasingkasing gikan sa ilawom sa yuta ang nabantayan sa ilang kahimanan:
Wala unta mopagawas og press statements silang kanhi Presidente Rodrigo Duterte ug Bise Presidente Sara Duterte pagkondenar nga nakalapas sa mga balaod ug tawhanong katungod ang operasyon sa kapolisan; ug
Wala unta magtagad si Harry Roque pagpangulo sa rally sa mga sakop ni Quiboloy sa Liwasang Bonifacio aron pag-awhag sa resignasyon ni Presidente Ferdinand Marcos Jr.
* * *
Wala gyod unta moulbo ang kaguliyang sa Davao kon:
Nituman pa lang sa lagda sa sistema sa hustisya si Quiboloy nga iyang obligasyon ang pag-atubang sa mga kasong gipasaka ug pag-surender sa korte nga niluwat og arrest warrant batok niya;
Nihatag pa ang mga Duterte og kahigayonan nga maka-irog ang proseso sa paghusay sa mga kaso batok ni Quiboloy; ug
Nisalikway pa ang mga Duterte sa tentasyon sa pagkabayo sa kontrobersiya aron sa pagkumbinser sa katawhan nga, tungod sa ilang impluwensiya ug popularidad, inutil ang administrasyong Marcos sa pagpatuman sa balaod batok ni Quiboloy.
* * *
- Latest
