Kamatayon sa 6 anyos nga bata sa Tabogon giimbestigar pa

CEBU, Philippines — Nagpadayon ang imbestigasyon sa Cebu Police Provincial Office(CPPO) pinaagi sa pakig-alayon sa National Bureau of Investigation sa nahitabo sa 6-anyos nga batang lalake nga na-missing og usa ka semana apan patay na nga napalgan sa Lungsod sa Tabogon.

Human sa usa ka semana nga pagpangita sa bata napalgan kini niadtong Enero 17, 2025 sa sapa sa Purok Kawayan, Barangay Libjo, sa nahisgutang lungsod.

Ang biktima gi-report sa iyahang amahan nga missing niadtong January 10, 2025 human nga wala na kini nakauli dihang nagduwa duol sa gitrabahoan sa amahan.

Gihimo ang search ang rescue sa Tabogon Municipal Police Station ug Municipal Disaster Risk Reduction and Management Office (MDRRMO).

Sa inisyal nga imbestigasyon, ang bata katapusang nakit-an nga dunay kaduwa nga duha kabuok kinsa miingon nga ang bata nilakaw paingon sa gitrabahoan sa iyang amahan dihang nangaligo sila.

Bisan paman sa pagpangita niadtong Enero 17 lang kini nakit-an nga wala nay kinabuhi.

Si CPPO Acting Provincial Director Police Colonel Jovito Atanacio mipaabot sa mga pahasubo niini sa pamilya sa bata ug mipasalig nga hatagan og hustisya ang nahitabo sa bata.

“The entire CPPO team shares in the grief of the victim’s family. We are steadfast in our pursuit of the truth behind this tragic incident. Rest assured, we will exhaust all efforts to uncover the facts and provide the family with the justice they deserve", ni Col. Atanacio pa.

Nanawagan ang otoridad sa publiko nga dunay impormasyon sa pagduol ug pag contact sa Tabogon Police Station aron makatabang sa imbestigasyon.  MEL BANAT NEWS