Layo rang 2028

Segun sa mga nangangkon nga suhito sa politika sa Davao City, wala isulti ni kanhi presidential legal counsel Salvador Panelo ang tinuod nga rason sa iyang rekomendasyon nga si kanhi presidente Rodrigo Duterte modagan pagbalik pagka mayor sa eleksiyon sunod tuig:

•             Segurong pildehon si bisan kinsa nilang Davao City Mayor Sebastian Duterte o Kongresista Paolo Duterte sa ilang ig-agaw nga si Kongresista Migs Nograles;

•             Di mahimong mo-resign si Bise Presidente Sara Duterte Carpio aron pagbalik sa City Hall; ug

•             Ang kanhi presidente ray bugtong makaluwas sa nagtakilid na nilang dinastiya.

***

Dili nang kasaligan daan ang mga pahibawo sa mga Duterte ug sa ilang mga turutot, labi na sa politika. Ang gi-boluntaryo sa bise presidente nga kasayuran nga pulos modagan pagka senador ang iyang amahan ug duha ka igsuong lalaki gibugal-bugalan dayon sa kanhi presidente.

Maong ang pahibawo ni Panelo mahimong lain nga pagsuway paglibog sa ilang mga kaatbang. Nisalir ang taktika sa nangaging mga eleksiyon nga sila pay hawod. Pero karong layo na sila sa luwag gamay na lay interesado sa pagtugkad unsa g’yud ang ipasabot sa ilang postura.

***

Mahimo gani nga wishful thinking na lang ang sulti ni Panelo. Kay ang mga Duterte nahibawo nga dili na sila maoy magbuot sa mosunod nga mga panghitabo. Nihungaw ang ilang mga awhag sa people power ug sa pagbakwi sa suporta sa kapolisan ug kasundalohan gikan sa ilang commander-in-chief. Nagsige og tibugsok ang ilang popularity ratings sa nasudnong surveys.

Daghan og kapilian ang Malacañang. Bisan pa kon dili gihapon madakpan si Apollo Quiboloy. Ug bisan pa kon dili dayon mogawas ang arrest warrant sa International Criminal Court (ICC).

***

Mahimong layo na kaayong 2028 aron i-apil pa sa mga plano sa mga Duterte:

•             Kon ma-impeach si Carpio sa House of Representatives ug ma-konbikto sa impeachment trial sa Senado, mahimong bag-o na ang bise presidente nga makapahimulos sa iyang gipangayo nga mas dakong budget sa 2025 (gawas nga dili nang kadagan sa 2028); ug

•             Kon ipadakop na sa ICC, mahimong dili nang kapangampanya ang kanhi presidente para sa eleksiyon sa Mayo 2025 (gawas nga mahimong dili na sab kaapil sa eleksiyong presidensiyal sa Mayo 2028).