Pagkabastos ni Torre miani po'g kabastos

Tungod sa social media ug sa diehard Duterte supporters-vloggers nakita sa tibuok kalibotan unsay matang sa inhustisyang gibuhat sa administrasiyong Marcos ngadto ni kanhi Presidente Rodrigo Roa Duterte, kinsa bisag walay warrant of arrest gikan sa korte sa Pilipinas, timaan nga wala gyod kini hatagig due process of law dinhi sa atong buhi-himsog-competent court, gipugos gihapon sa mga Pinoy'ng kapolisan nga gipangulohan sa kinakakuyawang CIDG Chief Major Gen. Nicolas Torre III, sa pagpasakay sa giandam na nilang pribadong jet plane, kuyog sa Interpol nga maoy ilang gitugyanan sa paghatod ni PRRD paingon sa International Criminal Court, The Hauge, Netherlands.

Bisag gialirongan na si PRRD sa kapolisan ug lugsanay na ganing makabarog, giposasan gihapon kini ni Torre, wala gyod manumbaling sa amahanong tingog sa tigulang: “Ayaw mog kahadlok, kay dili man ko modagan.”

Ultimong hangyo niini nga pasudlon iyang anak nga si Vice President Sara ‘Inday’ Z. Duterte sanglit iyaha man kining abogado, nagpabiling bato ang kasingkasing ni Torre. Wala gyod niya pasudla. Unya mimando pa si Torre sa iyang kapolisan nga aduna siyay ipabunlot. Ug kay walay bisan usang mituman, sa tumang kasuko naminti: “Hihilahin ko yan! Hihilahin ko yan!”

Dihang gisulayag bunlot ni Torre ang abogado ni PRRD, gipugngan siya ni Kitty Duterte, kinamanghorang anak ni Tatay Digong, kinsa maisogong mibadlong: “Huwag nyong hawakan ang abogado!...Huwag nyong hawakan ang ama ko! Huwag nyong hawakan ang ama ko!...” Dungan ang pagpagawas og hait kaayong tinutokan tumong kang Torre.

Kining kabastos nga nahuptan ni Torre, paspas kaayong mikuyanap sa social media. Diin, ultimong mga batang nakakita, nangasuko ni Torre. Resulta?

Sa Facebook page may mi-post (ambot anaa pa ba kaha kini?):  midrowing sa nawong ni Torre, gibutang sa punoan sa saging ug gidabodabohan pagsuntok hangtod nagisigisi ang hitsura dungan ang pagkahagba sa punoan; may papel naay dagway ni Torre, gipapilit sa punoan sa kahoy, giyawyawan-gihagit og sinukmagay, unya gilaksi-gikuniskunis-giyatakyatakan ug gisunog.

Unya, sa Davao City, samtang mipuno sa taas nga kadalanan ang bagang duot sa nagmartsang DDS, kinsa gisakitan sa kabastos ni Torre, may hut-ong nagpaninggit: “Torre, pis…t! Torre, pis…t!” Ug mabasol ba sila kon baslan nilag kabastos ang pagkabastos ni Torre?