Dugang POGOs sa Sugbo
Subaya unsa kapaspas ang Philippine Offshore Gaming Operator (POGO) sa paglikay sa ronda ug pagbalhin sa operasyon:
• Niadtong Hunyo 3 ning tuiga, nakahibawo ang mga tagdumala sa Lucky South 99 sa Porac, Pampanga, nga rondahon sila sa Presidential Anti-Organized Crime Commission (PAOCC) pagka sunod adlaw, Hunyo 4;
• Nanghipos dayon sa mga ekipo ug nanago sa nisunod nga lima ka adlaw; ug
• Niadtong Hunyo 8, nisakay ang pipila nila sa flight gikan sa Clark International Airport paingon sa Mactan-Cebu International Airport aron pagbalhin sa ilang operasyon sa Lapu-Lapu City.
* * *
Kon nakasugod dayon ug kon tinuod nga namalhin ra gikan sa Porac, duha pa ka buwan ang operasyon sa ilegal nga POGO sa Tourist Garden Hotel sa Agus, Lapu-Lapu City, dihang naronda niadtong Agosto 31.
Matod sa mga imbestigador wala silay ideya sa ilegal nga POGO. Kay ilang tuyo mao rang pagluwas sa 40 ka Indonesian nationals nga biktima sa human trafficking. Una ganing girumbo ang apartment sa Soong, Mactan. Dihang walay naabtan ayha pa sila nipadulong sa hotel diin naaktohan ang 169 ka langyaw nga gipasanginlang naghimo og scamming activities.
* * *
Gawas sa Agus, gidudahan nga duna pay illegal POGOs dili lang sa ubang mga barangay sa Lapu-Lapu kon dili sa uban pang mga lugar sa Sugbo. Ang sukaranan sa pagduda mao ang gidaghanon sa mga trabahante nga naka-ikyas sa Porac.
Sa kapin sa libo ka trabahante sa Porac compound, 157 ray naabtan sa ronda sa Hunyo 4 ug 169 sa ronda sa Agosto 31. Ang nahibiling kapin sa 800 mahimong nagpadayon sa ilegal nga operasyon.
* * *
Gipasaligan ang PAOCC sa lokal nga mga opisyal sa Sugbo nga human sa ronda sa Agus gihingusgan nilang inspeksiyon sa kadudahang mga negosyo sa ilang mga lugar. Apil nang mga nibalibad sa nangaging mga inspeksiyon o nipahibawo nga nihunong nang ilang produksyon pero wala pa manira.
Dili hinuon madalidali ang pagronda sa gidudahang illegal POGOs. Kay kinahanglan pang mag-surveillance ang PAOCC. Kon makahipos og igong mga ebidensiya, mangaplay og search warrant sa korte. Ug malusad lang ang ronda human makiglambigit sa Bureau of Immigration, National Bureau of Investigation, ug Criminal Investigation and Detection Group.
- Latest
