Ramirez hawod sa Marathon for Humanity

CEBU, Philippines -  Lab-as pa gikan sa iyang kadaugan, si Meirez Ramirez, misakmit na sab og laing korona human niya gidominar ang women's 42K race atol sa Red Cross 143: Lapu-Lapu Marathon for Humanity niadtong Domingo didto sa Hoopsdome sa dakbayan sa Lapu-Lapu.

 Human nidaog sa premier division sa Elizabeth Hotel Royal Run niadtong Sabado, si Ramirez mipatigbabaw sa mas lisud nga hagit sa Red Cross 143 Run nga gipasiugdahan ug gidumala sa Coco Running.

 Gitapos ni Ramirez ang makutas nga lumba sud sa tulo ka oras, 33 minutos ug 40 segundos.

 Si Sandra Sollano, kinsa mioras og 3:51:23 mipahiluna sa ikaduha, samtang ang kanhi Cebuana running queen nga si Christy Sevilleno-Tutor (4:06:21) ug ultra-marathoner Virgie Parajenog (4:26:43) mi-okupar sa ikatulo ug ikaupat nga dapit.

 Sa laing bahin, si Bonifacio Monjas maoy hari sa 42K men's class human niya gitapos ang dagan sud sa duha ka oras, 55 minutos ug 37 segundos. Gisundan ni Michael Largo alang sa  ikaduha sa oras nga 2:58:07, samtang ang Kenyan nga si  Francis Kakui mitapos sa ikatulo sa iyang 3:04:44.

 Laing Kenyan runners ang misakmit sa unang-duha ka dapit sa 21K action. Si Isaac Simat maoy labing kusog uban ang oras nga 1:15:39, ang iyang kababayan nga si Abraham Missos  mipahiluna sa ikaduha nga mi-oras og 1:16:06, samtang ang garbo sa Lapu-Lapu City nga si Ronnie Andrin mi-okupar sa ikatulo  sa oras nga 1:19.

 Ang igsuong babaye ni Ronnie nga si Jean nidaog sa women's 21K sa oras nga 1:44:44 batok nilang Kisha Delechos ug Carla Cosep nga mipahiluna sa ikaduha ug ikatulong dapit.

 Sa iyang bahin, si Darrel Manuz maoy naghari sa  men's 6K sa oras nga 20:28, gisundan ni Joel  Delposo (22:47) ug Joel Andrin (22:48).

 Ang top three finishers sa women's 6K division mao sila si Irish Delechos (24:05), Mary Joy Castor (32:08) ug Maylene Conde (32:47).  (BANAT NEWS)