CEBU, Philippines - Gidasig sa Cebu Football Association (CFA) ang local coaches pagpahimos sa higayon aron molawom pa ang ilang kinaadman pinaagi sa pagtambong sa libreng coaching seminar nga pagadumalaon sa Philippine Football Federation (PFF) ugma diha sa CFA office kilid sa Cebu City Sports Center.
Ang seminar limitado lamang alang sa 25 ka partisipante pinaagi sa first-come, first-served basis.
Dumalaon kini ni Thomas Roy, usa ka German national nga maoy PFF consultant alang sa ilang grassroots development program.
Ning duha ka adlaw nga seminar, ang PFF ug CFA motugot lang sa mga coaches kinsa nakaapil sa national coaching candidate seminar o niadtong nakaapil na bisan wala nipasar sa C-licensed course pagsalmot sa maong kalihukan.
Niadtong mga interesadong coaches, mahimong magparehistro sa CFA office. (BANAT NEWS)