Unsay maayo sa Pasko 2013

Namatikdan nga niining nagkaduol na nga adlaw sa pagsugat sa tungang gabii sa Disyembre 25 karong tuiga daw hinayhinay na usab natong namatikdan nga gipahimutang ang mga Paskohanong mga dayan-dayan sa kadalanan, mga mall ug kabalayan nga maoy nakahatag kadasig sa kasaulogan sa pagkatawo sa Balaang Bata  nga si Jesus nga atong giila  sa Kristohanong katilingban nga manunubos.

Nalangan hinuon ang pagpahimutang og Christmas décor sa katawhan  nga maoy nahimong epekto sa managkaluha nga katalagman  nga 7.2 magnitude ug bagyong Yolanda nga nagbilin og dakong kadaut sa Kabisay-an kay kun ordinary pa lang ang maong adlaw  angay na lamang gayod unta nga maoktaba ang maong tinuig nga kasaulogan.

Nunot sa maong adlaw sa pagsaulog sa adlaw nga natawhan ni Ginoong Jesus  sa panahon sa panagtapok sa katawhan dili usab kalikayan ang pagtumaw sa mga pangutana kun unsay maayo sa Pasko niining tuig 2013. Dugang pa nga dili maayo sa pagsaulog sa Pasko karong tuiga mao nga ang mga biktima sa bagyong Yolanda ug 7.2 magnitude tungod kay daghan pa man karon sa mga pamilya nga nagmagul-anon nga nawad-an ug wala pa mapapas sa ilang panumdoman ang nakalas nilang mahal sa kinabuhi.

Ang  nawad-an og panimalay, nawad-an og panginabuhi hilabihan ilang paghilukapa nga wala pa makabangon karong panahona ug gidunganan pa sa kamahal sa presyo sa mga  nag-unang palaliton nga naglakip sa bugas ug mga linatang pagkaon sama sa sardinas, gatas ug uban pa  nga wala gayod makontrol sa  Department of Trade and Industry (DTI) ug Department of Agriculture (DA) taliwala sa price freeze nga gipatuman sa kagamhanan.

Ang aksidente sa sakyanan sa kadalanan  ug ang panagbangga sa barko nga MV St.Thomas Aquinas ug kargo nga Sulpicio Express Siete nga mikalas usab og daghang  kinabuhi ug nakaapekto pa sa panginabuhi sa mga mananagat ug manindahay og isda.

   Gidugang sa Visayan Electric Company (VECO) ang  rotational brownout nga maoy hinungdan nga nahasol ang mga molupyo ug mga negosyante kay bisan pa kun adunay kaugalingong standby nga generator set apan makahatag man usab kini og dakong epekto sa dagan sa ilang negosyo.

Kun maghisgot kita og maayo sa Pasko karong panahona maisip ba nga maayo ang gidawat nga bonus, extra cash gift o 13th month pay sa pagtrabaho sa goberno, pribado nga kompaniya  o ang gidawat ba nato nga Pinaskohan nga gihatag sa atong mga higala.

Hinuon ang mga relihiyosong katawhan nga gisandig ang ilang kaugmaon kang Ginoong Jesus nga maoy gipahinungdan sa maong kasaulogan sa gihapon maoy ilang gibatonan ang kalig-on sa ilang kaugalingon sanglit alang kanila ang maayo sa Pasko mao man ang maayong panglawas ug   nakalingkawas sa mga hulga sa milabay nga  katalagman.