Ambot kinsay nagsuwat sa iyang diskurso. Klarong wala kahibalo nga maigo si Presidente Ferdinand Marcos Jr. sa iyang kaugalingong mensahe. Ambot gibasa bang daan ang diskurso sa wala pa niya himoa. Kay ang presidente morang nakigsulti sa iyang kaugalingon.
Giawhag niya ang katawhan sa pagbayad sa tukmang buhis atol sa iyang paglusad sa national tax campaign sa Bureau of Internal Revenue (BIR) niadtong Martes. Ang mga nasuhito sa iyang kasaysayan sa buhis giluod nga naminaw. Hinaot nga maapil og kakumbinser ang presidente ug ang tanang mga sakop sa iyang pamilya.
* * *
May nipasalig tingali ni Marcos Jr. nga dunay lightning arrester ang Philippine International Convention Center (PICC) sa Pasay City nga maoy gihimoan sa kalihokan. Maong masaligon nga dili siya kilatan sa pagpasidaan nga ipahamtang ang balaod batok sa mga nanikas sa buhis.
Gialerto na tingaling daan sa Presidential Security Command (PSC) ang iyang mga sakop sa pag-andam sa ilang labing modernong kahimanan batok sa sunog. O nagpakitabang nang daan sa Bureau of Fire Protection (BFP). Aron nga dili sila magkapuliki kon diha pay nikalit sa pag-aso atol sa diskurso.
* * *
Tinuod, dili fake news, nga nakonbikto si Marcos Jr. sa kasong tax evasion:
Napamatud-an sa Quezon City Regional Trial Court niadtong 1995 nga wala kabayad sa buhis ug wala ka-file og income tax returns sa 1982-1985 dihang siya pay bise gobernador ug dayon gobernador sa Ilocos Norte;
Ni-apelar sa Court of Appeals (CA) nga gipatigbabaw ang pagka konbikto niadtong 1997; ug
Ni-apelar sa Korte Suprema pero nahimong final ug executory ang pagka konbikto niadtong 2001.
* * *
Tinuod sab ug dili black propaganda nga ang presidente ug iyang pamilya maoy kinadak-an og utang sa buhis. Pagkamatay ni Ferdinand Marcos Sr. niadtong 1989, gipaninglan sa BIR silang mga sumusunod og estate tax nga P23 bilyones.
Human sa walay kinutoban nga paglangaylangay, gihukman sa Korte Suprema niadtong 1997 nga kinahanglang bayran ang utang. Nahimong final ug executory ang desisyon niadtong 1999. Sa kataposang demand letter sa BIR niadtong Disyembre 2021, niburot nang utang ngadto sa P203.8 bilyones. Ubos sa balaod, kon dili paninglon pag-usab hangtod sa 2026 mahimong mapapas ug dili na kabayran ang utang.