Kinawat nga Partido

Natay-og pag-ayo ang politikanhong partido ni kanhi presidente Rodrigo Duterte sa rekomendasyon sa House Quad Committee pagpasaka og kasong kriminal batok niya tungod sa lapad nga binayranay sa laktod nga pinatyanay sa iyang drug war. Nga sa press statement pagpanalipod niya nakalimot nga ila nang giusab ang ngalan sa grupo.

Sa ilang masuk-anong pagkondenar sa mga kongresista nga nangahas pagdeklarar nga nakalapas ang kanhi presidente sa International Humanitarian Law, nataligam-an sa kadagkoan sa partido nga ila nang giusab ang ngalan gikan sa karaan nga PDP-Laban ngadto sa PDP na lang.

* * *

Sa ilang nasudnong kumbensiyon dinhi sa Sugbo niadtong Abril ning tuiga, atol sa ika-42 nga anibersaryo sa partido, gitangtang nila nga walay klarong katin-awan ang pulong nga Laban, nga gikan sa Lakas ng Bayan, ang partido ni anhing Senador Benigno “Ninoy” Aquino Jr. niadtong 1978.

Gipabilin nila ang PDP, ang Partido Demokratiko Pilipino, nga gitukod ni anhing Senate President Aquilino “Nene” Pimentel Jr. atol sa nasudnong kumbensiyon nga gidumala nilang anhing House Deputy speaker Antonio “Tony” Cuenco ug anhing Ribomapil “Dodong” Holganza dinhi sa Dakbayan sa Sugbo niadtong 1982.

* * *

Dili mabasol ang mga dumadapig ni Duterte nga wala mohatag og bili unsa ang tinuod nga ngalan sa ilang partido kay gikawat ra kini nila. Ang anak sa nagtukod sa PDP nga si kanhi Senate president Aquilino “Koko” Pimentel III nikuwestiyon atubangan sa Korte Suprema sa pag-ilog ni Duterte sa liderato sa partido.

Niinsistir si Pimentel nga ilegal ang maniobra sa grupo ni Duterte sa pagpalagpot niya isip chairman ug ni kanhi senador Manny Pacquiao isip presidente sa PDP-Laban.

* * *

Matod sa PDP, nga nagtawag na sab sa ilang kaugalingon nga PDP-Laban, politikanhong pagpanggukod ang imbestigasyon sa Quadcomm nga walay nahipos nga ebidensiya nga nakalapas si Duterte sa Republic 9851, o ang Philippine Act on Crimes Against International Humanitarian Law, Genocide and Other Crimes Against Humanity.

Gawas nga nakalimot sa bag-o nilang ngalan, nataligam-an sab sa mga alyado ni Duterte ang iyang balikbalik nga testimoniya sa Senado ug sa House pag-angkon og hingpit nga responsibilidad sa tanang nahitabo, legal o ilegal man, sa drug war nga gilusad sa iyang administrasyon sa 2016 hangtod sa 2022.