Hulga sa mga Duterte

Unsa may nahitabo ni Presidente Ferdinand Marcos Jr. sa niaging semana? Isog siya sa Lunes. Pero lubay siya sa Biyernes. Sa Lunes, nideklarar siyang suklan ang plano sa pagpatay niya. Pero sa Biyernes, nanghinaot nga magkahigala sila pag-usab sa nanghulga sa pagpatay niya.

Sa Lunes, gisaway niyang mga pamalikas ug panghudlat ni Bise Presidente Sara Duterte. Pero sa Biyernes, gisalikway niya si Duterte nga dili angayng usikan og panahon. Sa Lunes, gikondenar niyang pagbabag ni Duterte sa imbestigasyon sa Kongreso. Pagka Biyernes, giawhag niyang mga kongresista sa dili pag-impeach ni Duterte.

* * *

Sa Lunes, niawhag siya nga dili angayng i-tokhang ang kamatuoran. Nga giisip nga pagpadayag sa hingpit niyang suporta sa nakabuylo nang imbestigasyon sa House Quad Committee sa extrajudicial killings ug reward system sa drug war ni kanhi presidente Rodrigo Duterte.

Pagka Biyernes, giawhag niyang mga sakop sa House of Representatives ug sa Senado sa pagtutok sa mas importante ug mas dinalian nga trabaho (nga mora hinuong samuksamok lang ang mga imbestigasyon) sa pagpasar sa nasudnong budget sa 2025 sa dili pa sila mamakasyon sa Pasko karong Disyembre 21.

* * *

Sa Lunes, giawhag ni si Duterte sa pagtubag sa lehitimong mga pangutana giunsa paggasto ang buhis sa katawhan imbes nga magpasalipod sa mga istoryang chichirya. Nga klarong iyang pagdason sa pagduda sa mga sakop sa House Committee on Good Government tinuod bang nakadawat sa confidential funds ni Duterte silang Mary Grace Piattos ug ubang kuwesiyonableng mga ngalan sa acknowledgment receipts.

Pagka Biyernes, gipahiyos niya ang eskandalo ni Duterte sa kalapad sa mga gimbuhaton sa pagdumala sa nasud.

* * *

Nindot untang paminawon ang tambag ni Marcos sa mga kongresista nga ang impeachment ni Duterte dili makatabang sa mga Pilipino. Kanindot sa iyang pasalig nga bisan sa mga pagsaway magpadayon siya pagpalambo sa nasud.

Ang nakapait mao nga ang mga insulto ug binastos sa mga Duterte sa niaging 11 ka buwan wala makahimo ni Marcos nga maayong presidente. Nagpabiling taas ang presyo sa mga palaliton, ubos ang suholan, ug kabos ang kinabag-an. Kon dili mahipos ang mga Duterte, mahimong makabalik sila sa Malacañang. Nga giisip nga mas dakong trahedya kay sa pagbalik sa mga Marcos sa gahom.