Nanghilam-os sa bawos
Tambaloslos. Bangag. Mahimong ordinaryo lang nga mga bugalbugal para sa mga Duterte. Pero mahimo sab nga maoy mga pabilo sa pagkabungkag sa ilang alyansa ni Presidente Ferdinand Marcos Jr. Mahimo sab gani nga moresulta sa paghagsa sa ilang politikanhong dinastiya.
Daghang mas grabeng bugalbugal, sa walay paghisgot sa gipasangil nga bangis nga mga krimen, nga nahimo sa mga Duterte. Pero wala mosumbalik nila. Walay nangahas pagpaningil. Kay kasagaran sa naligsan walay ikasukol. Ilang gahom ug impluwensiya ug kamaginukdanon maoy nakapugos sa mga biktima sa pagluklok sa suok sa tumang kahadlok.
* * *
Hangtod nga natsambahan nga ang gitawag nila og tambaloslos dunay katakos sa pagbawos. Kay naghupot og puwesto nga makaharung sa ilang kahawod. Utro sang hakog sa gahom ug gipasanginlan nga kawatan. Baga sab og nawong maong madutli sa kauwaw ug wala motalaw.
Resulta? Usa sa mga Duterte gihukasan sa tanang confidential funds, gi-imbestigar giunsa paggasto ang nahatag nang pundo ug, dihang nabisto ang daghang bulilyaso, giinat pag-ayo ang hapit kada semana nga public hearings aron sa pagbisto niya sa publiko. Nga labaw pa sa pagka tambaloslos ang iyang bisyo.
* * *
Mas mapailubon ang gitawag nga bangag. Igo lang naghisgot og fentanyl. Wala mokiha bisan gipakatap sa social media ang deepfake nga pulvoron video. Wala motingog bisan gi-pantasyahan nga putlan og liog ug bisan gihudlat nga ugkaton ang patayng lawas sa amahan ug ilabay sa West Philippine Sea.
Gibuak hinuong pagpakahilom dihang gihulgang patyon uban sa iyang asawa ug ig-agaw. Nabatyagan sa mga Duterte unsa kalisod awayon sa gobyerno. Ang kainutil sa mga giyatakan sa sila pay nagtungkawo sa gahom mao say nabatyagan karon.
* * *
Mahimong kasohan ang mga Duterte sa tanan nilang sulti: Apil nang pagbalikbalik og awhag og kudeta sa niaging 10 ka buwan; ug paghudlat sa paghiwa sa Mindanao gikan sa republika.
Samang gisugdan na pagkiha sa ilang mga buhat: Apil nang pagbabag sa pagbalhin ni Atty. Zuleika Lopez ngadto sa Mandaluyong; pagtukmod sa doktor sa Philippine National Police; laktod nga pinatyanay sa 30,000 ngadto sa 35,000 ka mga biktima sa drug war; pagpangawat sa Pharmally, frigate, ug ubang eskandalo; ug pagtago og ?2.4 bilyones sa mga bangko.
- Latest
