Nideklarar si kanhi Cebu City mayor Mike Rama nga nahibalik na pagka mayor niadtong Biyernes, Nobyembre 8, kay napupos nang unom ka buwan niyang preventive suspension nga gisugo sa Ombudsman ug wala pay kopya sa desisyon sa Ombudsman pagtaktak niya sa serbisyo. Lisod tuohan nga wala pa siyay kopya sa ikaduhang desisyon kay:
• Nipasaka siya’g motion for reconsideration niadtong Oktubre 15 batok sa iyang pagkataktak sa serbisyo; ug
• Pinasikad sa samang desisyon, nipasaka og petisyon ug nakakuha siya og temporary restraining order sa Korte Suprema batok sa Commission on Elections.
* * *
Samtang gibalibaran ang mga sakop sa Cebu City Council sa ilang gipangayo nga mga dokumento sa kalangay pagtiwas sa Cebu City Medical Center, kay mangayo pa ang mga inhinyero sa City Hall og pagtugot gikan ni Mayor Raymond Garcia, napamatud-an sa grupo ni Rama nga mas maayong dili mananghid ni Garcia.
Walay nangahas pagbabag sa mga abogado ni Rama nga nag-press conference sa conference room sa Mayor’s Office ug ni kanhi city adminisrator Collin Rosell nga nag-opisina didto. Hangtod nangunay si Cebu City Police Diretor Antonietto Cañete pagposas niya.
* * *
Ambot kon gawas sa paukyab unsay plano sa grupo ni Rama sa pagsulod sa City Hall:
• Nga moyukbo ang tanang trabahante ug mohangop sa ilang pagbalik human sa tunga sa tuig nga wala magkita?; o
• Nga mokurog si Garcia, modalidali og pamutos, mangayo og pasaylo, ug mobalik og ulug-ulog ni Rama?; o
• Nga libotan sa mga Sugbuanon ang City Hall, sung-ayon nila si Rama ug, samang Serging Osmeña, pasidunggan nga manluluwas sa demokrasya sa Sugbo?
* * *
Pero ang naklaro mao nga wala igkita si Rama sa tibuok nga salida. Nangangkon ang iyang grupo nga nibalik na siya sa pagduma sa syudad sugod sa alas-8 sa buntag niadtong Biyernes pero wala siya motungha. Natanggong na lang si Rosell sa Waterfront Police Station pero wala siya molili.
Nga mao’y tinuod nga simbolo sa iyang liderato. Gikan sa saad paghimo sa syudad nga laing Singapore, ug Belgium, ug Taiwan, ngadto sa pasalig sa pagsulbad sa baha, basura, trapiko, katimawa, pangurakot, ug kriminalidad, si Rama wala pay napakita. Nanggungis na lang, kutob lang gihapon sa istorya.