Paugat ni VP Sara
Luag ang mga lagda paggasto sa confidential funds (CF). Sayon rang lutsan. Dili kinahanglang i-detalye unsay gigastohan. Dili kinahanglang official receipts (ORs), mahimo rang acknowledgment receipts (ARs). Kinahanglan lang isumiter ang mga dokumentong mopasalig sa kapuslanan sa gasto. Sama sa unsay natabang sa pagpatuman sa proyekto.
Dako ang tentasyon pagbolsa sa CF. Tabonan lang sa pekeng mga resibo. Ug certifications nga natuman ang mga lagda. Maong nagkauyon ang mga kongresista ug mga senador nga hugtan ang panginahanglan. Ug dili hatagan og CF ang mga ahensiya nga walay labot sa seguridad.
* * *
Bisan sa kataphaw sa mga panginahanglan, wala magkadimao ang mga dokumento nga gisumiter sa Office of the Vice President (OVP) ngadto sa Commission on Audit (COA):
• Giangkon nila ang kalihokan nga wala silay gasto bisan usa ka dako;
• Namalit og mga pagkaon ug tambal nga walay koneksiyon sa pangespiya; ug
• Nisumiter og gatosan ka ARs nga sayop ang mga petsa, walay mga ngalan ang mga pirma, dunay mga ngalan pero dili mabasa, pareha og agi ug tinta, ug managsamang beneficiaries sa CF sa OVP ug Department of Education (DepEd).
* * *
Nganong ang ikaduhang kinatas-an nga opisyal sa nasud, nga abogada ug beterana nga mayor og syudad, naglikay-likay man sa pagpasabot sa kontrobersiya? Tingali kay:
• Wala sukad masukad makasuway nga pangayoan og kuwentada sa mas dagko nilang gasto sa Davao City;
• Wala magpaabot nga kutikutihon sa COA ug Kongreso bisan nahagsa ang ilang UniTeam tungod sa 32 milyones niya ka boto sa niaging eleksiyon; o
• Nahinaykan sa paggasto ang kuwarta sa laing katuyoan.
* * *
Sayop ang pagtuo ni Bise Presidente Sara Duterte nga dili mautingkay ang kuwestiyonable niyang mga transaksiyon sa iyang pag-insistir nga adto ra motubag og mga pangutana sa COA ug sa mga korte kon dunay mga kasong ipasaka. Nakakita og paagi ang mga kongresista sa paghipos og dugang mga saksi ug mga ebidensiya batok niya.
Wala sab katabang ang press conferences nga siya ray magbuot unsay tubagon nga mga pangutana. Padayong pagtibugsok sa iyang ratings (nga mas popular na gani hinuon si House Speaker Martin Romualdez kay niya) maoy pahinumdom nga wala ganahi ang mga magbubuhi giunsa niya pagwaldas ang ilang kuwarta.
- Latest
