Eskandalo sa Senado
“Kon gusto kang motan-aw og replay sa imbestigasyon sa House Quad Committee sa extrajudicial killings (EJKs) sa drug war ni kanhi presidente Rodrigo Duterte, atangi karong Lunes ang buwag nga imbestigasyon sa Senado.” Mao nay sulti sa viewer sa among programang “Baruganan” sa YouTube ug uyon ko niya.
Bisan unsaon og palami og istorya nilang Senate President Chiz Escudero ug Senate Minority Leader Koko Pimentel, klarong mosunod lang sila sa malampusong imbestigasyon sa mga kongresista. Sa kontrobersiya nga mga senador untay unang nangimbestigar pero ilang gibiyaan walo ka tuig nang nilabay.
* * *
Napugos lang si Escudero sa pagtugot sa imbestigasyon aron paglikay sa mas dakong eskandalo: Eskandalo nang daan nga nagpakahilom sa duguong kabilin ni Duterte, mas dakong eskandalo kon magbuut-buot ang duha ka senador nga gilambigit sa EJKs pag-imbestigar sa ilang kaugalingon.
Ilang solusyon? Dili silang Bato dela Rosa ug Bong Go ang mangulo sa imbestigasyon pero makaapil sa pagsukit-sukit sa resource persons nga nipasangil nila og responsibilidad sa pagpatuman sa EJKs ug sa lapad nga binayranay sa mga polis nga nakapatay sa ilang gilista nga suspitsadong mga durugista.
* * *
Dili kasulbad sa kabakikaw sa imbestigasyon ang tanyag ni Dela Rosa nga mahimo sab siyang resource person. Aron matubag niya ang tanang pangutana sa EJKs ug cash rewards isip kanhi hepe sa Philippine National Police.
Ambot unsay dagway sa imbestigasyon kon si Dela Rosa mangutana isip senador ug mao ra say motubag sa iyang mga pangutana isip resource person. Ug ambot unsa kagawasnon ang testimoniya sa resource persons batok ni Dela Rosa kon makapangasaba siya nila.
* * *
Gitugyan ni Escudero ang trabaho ngadto sa Senate Blue Ribbon Committee kay, ubos sa ilang lagda, mao ray makalusad og imbestigasyon atol sa bakasyon. Pero dili interesado si Chairperson Pia Cayetano. Maong nagdalidali sila og tukod og subcommittee nga pangulohan ni Pimentel.
Kansang sitwasyon dili kasinahan. Siyay mobanhaw sa imbestigasyon nga iyang gisabotahe dihang gipalagpot si kanhi senador Leila de Lima isip pangulo sa orihinal nga imbestigasyon. Siya say mangutana ni Duterte, kon mogawas sa iyang moskitero ug mopakita sa imbestigasyon, nga human niya sipsipi sa 2016 maoy nangilog sa partido ni Pimentel nga PDP-Laban niadtong 2022.
- Latest
