Duterte, Bato, ug Go

Klarong wala silay group chat. Kay managlahi ang sulti nilang kanhi presidente Rodrigo Duterte, Senador Bato de la Rosa, ug Senador Bong Go. Labot sa pasangil ni Koronel Royina Garma nga gibayran ang kada patay sa gidudahang mga durugista sa drug war sa niaging administrasyon.

Giklaro ni Duterte nga walay polis nga gibayran og kuwarta sa extrajudicial killings. Gihimakak ni Go nga niagi sa iyang opisina ang kuwarta nga gibayad ngadto sa kapolisan. Pero si De la Rosa niangkon nga gisugo ni Duterte si Go paghatag og kuwarta sa mga polis.

***

Ambot natarantar ba lang sa affidavit ni Garma --nga mahimong sundan karong semanaha sa pagbalitok nilang Koronel Edilberto Leonardo ug ubang resource persons sa House Quad Committee. Maong wala na makahunahuna sa pagkita aron magsabot sa ilang depensa. Pero may pasidaan sab nga maniobra ning Duterte:

•Gipaabot lang nga mosakay ang tanan sa pinili nga mga detalye nga gikumpisal ni Garma; sa dili pa

•Molikoy si Garma nga napugos lang paghimo sa ikaduhang affidavit kay gihaylo ug gihulga sa kampo nilang House Speaker Martin Romualdez ug Presidente Ferdinand Marcos Jr.

***

Bisan giklaro nga para sa plite ug gastohan, giangkon ni De la Rosa nga naandan ni Duterte, sa mayor pa hangtod na-presidente na, pagsugo ni Go paghatag og kuwarta sa mga polis nga manambong sa ilang mga tigom. Nga nisukwahi sa:

•Sulti ni Duterte nga ang mga polis nga nilampos sa misyon gipakaon ug gipainom lang kay nauwaw pagdawat og kuwarta; ug

•Pag-insistir ni Go nga ang iyang pagka assistant ni Duterte wala maglakip sa kuwarta ug kapolisan.

***

Atong atangan unsay mahitabo sa ikasiyam nga public hearing sa quadcom karong Martes, Oktubre 22:

•Tumanon bang Leonardo ang iyang pasalig ngadto ni House Human Rights Committee Chairperson Benny Abante sa paghatag og dugang kasayuran parte sa mga krimen nga gipasangil batok niya?; ug

•Moatubang ug manglawgaw na ba lang sa imbestigasyon sa mga kongresista silang De la Rosa ug Go human balibari ni Senate President Chiz Escudero ang ilang plano nga sila ra say mo-imbestigar sa ilang kaugalingon?; ug

•Mokuyog ba nila si Duterte aron balikason si Marcos ug Romualdez, masaligon nga dili mangahas ang House pagpapriso niya?