Panguwarta sa EJKs
Nanghambog bang mga pangulo sa House Quad Committee nga kapamatud-an nila nga ang confidential ug intelligence funds (CIF) ni kanhi Presidente Rodrigo Duterte kabahin sa minilyon ka pesos nga gibayad sa extrajudicial killings (EJKs) sa niaging administrasyon?
O nakalili na sa findings sa Commission on Audit (COA) giunsa pagtilok ni Duterte ang iyang P21 bilyones nga CIF gikan sa 2017 hangtod sa 2022? Usa sa mga pangulo niangkon nga gisusi na nila kon ang sulbong sa gasto sa CIF natunong ba sa mga higayon nga daghang high value targets ang gitumba.
* * *
Samtang P600 milyones ray gipangayo ni kanhi Presidente Gloria Macapagal-Arroyo sa kataposang tuig sa iyang administrasyon sa 2010 ug P500 milyones ray gihangyo ni anhing Presidente Noynoy Aquino sa 2016, si Duterte nidemanda ug nahatagan og:
•P2.5 bilyones sa 2017;
•P2.5 bilyones sa 2018;
•P2.5 bilyones sa 2019;
•P4.5 bilyones sa 2020;
•P4.5 bilyones sa 2021; ug
•P4.5 bilyones sa 2022.
Wala papiri, nipaugat si Presidente Ferdinand Marcos Jr. nga nikopya sa CIF ni Duterte sa 2023 ug 2024.
* * *
Kon wala gamita sa EJKs, unsay gigastohan ni Duterte sa iyang CIF? Wala kapusli sa pagpugong sa Maute group sa pag-atake sa Marawi City sa 2017 nga nikalas og 1,200 ka kinabuhi. Walay nahimo pagpanalipod sa atong mga mangingisda gikan sa panghasi sa China sa West Philippine Sea.
Posibleng gigasto pag-imbento og mga ebidensiya pagpapriso ni kanhi Senador Leila de Lima, pagkiha sa ubang mga lider sa oposisyon ug pag-intriga sa pagkababaye ni kanhi Bise Presidente Leni Robredo.
* * *
Kon nasakpan sa mga kongresista ang pataka nga gasto ni Bise Presidente Sara Duterte sa iyang confidential funds sa 2022 ug 2023, segurong mahibaw-an sab nilang abilidad sa amahan. Gawas lang kon tagoan ug pahilumon, makatabang si Irmina “Muking” Espino, sinaligan ni Senador Bong Go, ug Pedro Parungo, sinaligan ni Koronel Edilberto Leonardo, pag-detalye atubangan sa quadcomm sa pagsulod-gawas sa minilyon ka pesos:
• Gikan sa upisina ni Go sa Malakanyang;
• Ngadto sa bank accounts ni Parungo;
• Ngadto ni Leonardo; ug
• Ngadto sa tanang nakakuwarta sa EJKs.
- Latest
