Magsugod ni Skyler
Dako ang problema sa kapolisan. Kon tinuod ang bag-ong affidavit ni Koronel Royina Garma nga gisumiter ngadto sa House Quad Committee, ang tibuok organisasyon gigamit ni kanhi presidente Rodrigo Duterte sa laktod nga pinatyanay sa ilang gilista nga gidudahang mga durugista. Ug hapit tanang polis natental sa dagkong cash rewards sa kada suspek nga ilang napatay.
Maayong sinugdanan ang pagsugo ni Police General Rommel Marbil, hepe sa Philippine National Police (PNP), sa nangaging mga hepe pagpasabot giunsa nila pagpatuman ang drug war. Pero unsa kakasaligan ang imbestigasyon sa mga polis batok sa ilang kaubang mga polis?
* * *
Sa kadako sa problema, asa man sila magsugod? Sa Cebu City, mangahas ko og sugyot nilang Police Colonel Antonieto Cañete, hepe sa Cebu City Police Office (CCPO) ug Police Brigadier General Anthony Aberin, direktor sa Police Regional Office sa Central Visayas, nga magsugod sila sa kaso ni Skyler Abatayo, ang 4-anyos nga napatay og polis sa Bato, Ermita, niadtong 2018.
Makatabang sa ilang pakisusi ang paglili sa mga dokumento sa mga kasong kriminal nga gilawa-lawaan sa Visayas Ombudsman sulod na sa kapin sa unom ka tuig batok sa tulo ka sakop sa Carbon Police Station.
* * *
Ang National Bureau of Investigation ang nipasaka og kasong pagpatay batok ni Police Officer 1 Wilbert Perez, dereliction of duty batok ni PO1 Rey Van Daduda, ug obstruction of justice batok ni Senior Inspector John Kareen Escober.
Nahitabo ang krimen pila ka adlaw sa wala pa matudlo si Garma sa CCPO. Pero iyang gidasonan ang bersiyon sa kapolisan nga drug lord ang nakapatay sa bata. Imbes pasalamatan ang NBI-7 ug pasiunang timaan sa iyang kasikit sa Malacañang, gipalabay ni Garma si regional director Patricio Bernales Jr. sa Mindanao.
* * *
Lima ka tuig human niretiro si Garma sa PNP ug duha ka tuig human nikanaog si Duterte sa Malacañang, wala pay hustisya ang kamatayon ni Skyler. Gawas nga wala matangtang sa puwesto, na-promote ang gikihang mga polis. Si Lieutenant Colonel Escober hepe na sa Provincial Mobile Force Company sa Bohol.
Hinaot matandog silang Cañete, Aberin, ug Marbil kon mahibawo nga namatay si Skyler sa adlaw nga nakat-on pagsuwat sa iyang ngalan.
- Latest
