Nilungtad lang og pila ka oras ang kakugang sa mga nanan-aw sa imbestigasyon sa House Quad Committee sa bag-ong affidavit ni Koronel Royina Garma nga niangkon nga gipatuman sa tibuok Pilipinas ang “Davao template” sa kampanya batok sa ilegal nga drugas sa administrasyon ni kanhi presidente Rodrigo Duterte.
Kay naklaro nila nga walay krimen nga giangkon si Garma ug wala sab siyay krimen nga gipasangil batok ni Duterte. Igo lang niyang gilista silang Senador Bong Go, Koronel Edilberto Leonardo, ug kaubanan sa walay paghisgot unsay ilang nahimong kalapasan sa balaod.
***
Nangayo si Garma og pasaylo sa mga Sugbuanon sa walay pag-detalye sa kasaypanan sa Cebu City Police Office. Nidupa sa iyang mga sakop nga nituman sa rules of engagement ug panghunaw nga walay labot sa mga nahitabo sa crime scene.
Wala niya hisguti ang ilang pagsabotahe sa imbestigasyon sa kamatayon sa 4-anyos nga si Skyler Abatayo nga napusilan sa polis sa Carbon niadtong 2018. Dihang gikiha ang mga polis sa National Bureau of Investigation (NBI), gipalabay niya sa Mindanao si kanhi NBI Central Visayas director Patricio Bernales Jr.
***
Bisan walay krimen nga gihisgutan, klarong gihan-ok ni Garma ngadto nilang Go, Leonardo, ug kaubanan ang paghimo sa plano sa paglista sa mga durugista ug pagbayad sa mga nakapatay nila. Niangkon nga siyay nirekomendar ni Leonardo ngadto ni Duterte pero niinsistir nga walay labot sa mga operasyon.
Gipatuong mga kongresista nga nakuha niya ang mga detalye sa binayranay gikan ni Leonardo ug sa mga istorya sa ubang mga polis nga iyang nadunggan.
***
Bisan sa kahanap sa mga detalye, napuslan sa mga kongresista ang bag-ong affidavit ni Garma:
•Naklaro na nganong daghang nangamatay sa kampanya kay mas dako ang bayad sa mga polis nga nakapatay, samtang gi-ulian lang sa gasto sa ilang operasyon ang mga dunay buhi nga mga dinakpan; ug
•Dunay sukaranan ang pag-imbestigar sa kalapasan sa mga lagda batok sa money laundering sa mga naghupot sa pribadong bank accounts nga gihimong mga imbudo sa minilyon ka pesos nga giaprobahan nilang Go ug Leonardo ug gi-apud-apod ngadto sa mga opisyal ug mga sakop sa kapolisan nga naka-report sa tanan nilang napatay sa kampanya.