Desperadong mga Duterte
Atubangan sa nagkagamay nilang kalibotan tungod sa pagkasikop ni Apollo Quiboloy, makadaot nga kasayuran sa extrajudicial killings, ug pangurakot sa ilang administrasyon nga nanggawas sa imbestigasyon sa House Quad Committee ug sa dugay rang gihugun-hugon nga arrest warrants sa International Criminal Court (ICC), dunay duha ka kapilian ang mga Duterte:
• Una, ang pagsuway pagdugang sa ilang puwersa sa Senado aron mabaraw ang posibleng impeachment complaint batok ni Bise Presidente Sara Duterte Carpio; ug
• Ikaduha, ang pagseguro nga dili mailog sa mga alyado ni House Speaker Martin Romualdez ang Davao City.
* * *
Ang unang kapilian maoy gibasehan sa pahibawo ni Bise Presidente Sara Duterte Carpio niadtong Hunyo nga tulo ka Duterte ang mag-senador: kanhi presidente Rodrigo Duterte, Kongresista Paolo Duterte, ug Davao City Mayor Sebastian Duterte. Nanghinaot silang makakuha og labing menos siyam ka lingkoranan sa Senado human sa eleksiyon sa Mayo 12, 2025 aron:
• Kalikayan ang two-thirds majority vote sa administrasyon; nga
• Igong maka-konbikto ni Sara sa impeachment trial; nga
• Dili lang makataktak niya pagka bise presidente, kon dili
• Mapahamtangan pa og perpertual disqualification sa paghupot og puwesto sa gobyerno.
* * *
Nidangop ang mga Duterte sa ikaduhang kapilian kay nitibugsok ang rating sa kanhi presidente ug wala kasulod sa Top 12 ang laing duha ka Duterte sa senatorial surveys. Sa akong pagsuwat ini, kinakusgang baraha ang ilang gigamit.
Gituohang dili mapilde ang kanhi presidente sa syudad nga ilang gidominahan sa niaging 36 ka tuig. Bisan kon ang kinakusgan pa sa mga Nograles, ilang paryente nga si kanhi Cabinet secretary Karlo Nograles, maoy nangahas paghagit nila.
* * *
Nga nagmatuod sab unsa ka-desperado ang mga Duterte. Kinahanglang mangaliya sa Ginoo nga gitawag sa kanhi presidente nga estupido. Kay mahimong gamiton sa administrasyon ang Cebu template, ang paggamit sa kapolisan pagpilde ni kanhi Cebu City Mayor Tommy Osmeña sa 2019, sa pagpukan sa ilang dinastiya.
Ug bisan mapanalipdan nila ang Davao City, bisan sa makalilisang nga ayuda nga gipabaha sa Malacañang, mahimong ma-impeach sa Sara sa House ug mapalagpot sa Senado sa dili pang eleksiyon sa Mayo. Nga kon dili kapugngan sa dugay nang gipangandoy nga people power, makapa-mingaw sa ilang payag, ug makahingpit sa ilang ka-inutil, sa 2028.
- Latest
