Nangangkon nga mga suhito sa political surveys nipahimangno nga walay kahulogan ang mga numero kon ratings lang sa mga kandidato ug kandidata ang imong tutokan. Kay tinuod lang ang mga numero sa mga adlaw o semana sa paghimo sa survey, bisan unsa ka-siyentipiko ug kamakiangayon.
Nitambag sila nga mas mapuslanon kon subayon ang lihok sa mga numero: Bisan unsa kataas sa imong ranggo pero niubos kon ikumparar sa nangaging surveys duna kay problema; ug bisan unsa kaubos pero nisaka kon ikumparar sa gisundan nga surveys mahimo kang mosulbong dayong eleksiyon.
* * *
Ginamit ang maong giya, angay’ng mabalaka ang mosunod nga tag-as og ranggo sa survey sa Social Weather Stations (SWS):
• Niubos si kanhi Presidente Rodrigo Duterte ngadto sa No. 4 sa Septiyembre gikan sa No. 2 sa Marso;
• Natagak si kanhi Senador Manny Pacquiao ngadto sa No. 11 sa Septiyembre gikan sa No. 6 sa Marso;
• Ni-us-os si Senador Bong Go sa No. 12 sa Septiyembre gikan sa No. 10 sa Marso; ug
• Nitidlom si Senador Bato dela Rosa sa No. 13 sa Septiyembre gikan sa No. 5 sa Marso.
* * *
Angay sang madasig ang mosunod nga labing dako og layat:
• Nisulbong si Kongresista Camille Villar sa No. 8 sa Septiyembre gikan sa No. 20 sa Marso;
• Nikatkat si Makati City Mayor Abby Binay sa No. 9 sa Septiyembre gikan sa No. 16 sa Marso;
• Nisaka si Senador Francis Tolentino ngadto sa No. 14 sa Septiyembre gikan sa No. 26 sa Marso; ug
• Nisutoy si Interior Secretary Benhur Abalos sa No. 16 sa Septiyembre gikan sa No. 31 sa Marso.
* * *
Mabuhi sab ang dugo sa politikanhong oposisyon kay:
• Nitungtong si kanhi Senador Kiko Pangilinan sa Liberal Party sa No. 15 sa Septiyembre gikan sa No. 18 niadtong Marso;
• Nilukso si kanhi Senador Bam Aquino sa bag-o niyang partido nga Katipunan ng Nagkakaisang Pilipino ngadto sa No. 17 sa Septiyembre gikan sa No. 29 sa Marso; ug
• Naalsa si Chel Diokno ngadto sa No. 23 sa Septiyembre gikan sa No. 31 sa Marso (posibleng wala hinuon makumbinser si Diokno sa iyang kahigayonan sa Senado kay nidawat nga mahimong No. 1 nominee sa Akbayan Party-list).