Unsay tinuod, unsay salida
Wala pa siya magpakiluoy pero hapit na. Human nagpatuo nga maoy agawon sa kalibotan, si Apollo Quiboloy nipahinumdom sa korte nga 74 anyos na siya, daghan na og sakit, mahimong dili na makalahutay kon ibalhog sa naghuot ug nangalisbo nga selda ug busa mahimo bang tanggungon lang sa ospital sa Davao?
May sagol pang kahawod ang petisyon nga gipasaka sa iyang mga abogado. Nga dako ang kahigayonan nga ibasura sa korte karong semanaha. Kay napamatud-an sa mga doktor sa kapolisan nga lig-on ang iyang panglawas ug walay seryusong sakit.
***
Nagpakiluoy na siya pero wala matandog ang mga kongresista. Grabeng hilak ni Koronel Royina Garma nakaaghat hinuon nila pagtugot nga ikauban sa pagkatanggong sa House of Representatives ang anak nga iyang giingong katulo na mosuway paghikog ug nagkinahanglan sa iyang pag-atiman.
Wala siya pugsa pag-atubang ni kanhi Cebu City Mayor Tommy Osmeña, nga usa sa labing suhito sa laktod nga pinatyanay sa syudad ug ubang pangabuso nga gipasangil batok niya, kay niangkon nga tikig ang liog. O tingali tungod kay POGO ug dili EJKs ang sentro sa pakisusi sa niaging semana.
***
Walay kabalaka silang Alice Guo ug Cassandra Ong nga ibalhin na sa tinuod nga prisohan karong semanaha. Tingali tungod sa ilang kabatan-on. O sa pasalig o hudlat sa sindikato nga gidudahang nagmaniobra nila.
Ambot magpabilin bang kalma si Guo kon maipon na sa laing 44 ka piniriso sa selda nga para lang sa siyam sa female dormitory sa Pasig City Jail. Ambot maka-atiman pa ba si Ong sa iyang buhok kon ihansak sa nag-awas sang Correctional Institution for Women sa Mandaluyong.
***
Si kanhi Presidente Rodrigo Duterte, 79, gipaabot nga ipadakop sa International Criminal Court (ICC) karong tuiga. Mosuway ba pagtago sama ni Quiboloy o isog nga moatubang sa pasangil nga crimes against humanity batok niya?
Nagsugod na og pakita sa iyang kaluya. Nagsaguyod sa pipila ka Maisug rallies. Pero sa kaso ni Duterte, sama sa tanang nalista sa ibabaw, walay makaseguro unsay tinuod ug unsay salida. Sama sa iyang alyadong si Gloria Macapagal Arroyo, 77. Nga kalit lang nakalimot sa iyang neck brace ug wheelchair human nakalingkawas sa hospital arrest.
- Latest
