Paggasto ni Presidente Ferdinand Marcos Jr. og P3.19 bilyones sa buhis sa katawhan aron makapangangkon nga nagsaulog ang tibuok nasud sa iyang birthday natunong sa ikatulong semana nga naglugaw ug nagsuwa og asin ang 63 ka tripulante sa BRP Teresa Magbanua samtang gilibotan sa 68 ka barko sa China sa Escoda Shoal sa West Philippine Sea (WPS).
Wala niya apila ang mga bayani nga nanalipod sa atong teritoryo. Kay ang kasaulogan, nga walay kalainan sa mga salida sa diktadura sa iyang ginikanan, dili para sa nasud kon dili para niya.
***
Sa adlaw nga nagkumbira uban sa suod nga mga higala sa kinamahalan nga mga pagkaon ug ilimnon, dinuyogan sa balor og P60 milyones nga pribadong konsiyerto sa iyang paboritong banda nga Duran Duran, mao ang samang adlaw nga nahutdan ang mga tripulante og bugas nga malugaw ug tubig nga mainom.
Pero wala mahasol ang ilang pabusdik. Kay ang iyang administrasyon, sama sa kapin sa duha ka dekadang pamunoan sa iyang amahan ug inahan, dili para sa kaayuhan sa kinabag-an. Kon dili para lang sa pagpaburot sa pribadong mga bolsa.
***
Nipasigarbo ang Malakanyang nga bisan sa pagbabag sa China nilampos ang resupply mission sa BRP Teresa Magbanua pinaagi sa helikopter duha ka semana ang nilabay. Pero segun sa masakitong mga tripulante tulo ka semana na silang naglugaw-lugaw. Wala itug-an sa administrasyon nga nailog sa China ang suplay sa pagkaon.
Wala maproblema ang palasyo. Ang lugar sukad pa sa iyang pagkabata walay luna para sa tinuod nga gipanggutom. Kay para lang sa mga walay busganan sa gahom.
***
Nanumpa si Marcos Jr., aron pagpahumot sa katawhan ug sa ubang kanasuran, sa pagpanalipod sa kada pulgada sa WPS. Pero tungod sa iyang pagpabaya, mahimong mailog sa China ang Escoda. Sama sa ilang pagsakmit sa Panganiban (Mischief) Reef sa 1995 ug sa Bajo de Masinloc (Scarborough Shoal) sa 2012.
Walay arang niya. Kay nakat-onan gikan sa iyang mga ginikanan, ug sa iyang gipulihan nga si kanhi Presidente Rodrigo Duterte, nga mahimo rang mosaad bisan unsa. Kay ang paukyab nga istorya dili kinahanglan nga motakdo, mahimo man ganing magsilbi nga hapin, sa kalaksot sa aktuwal nga buhat.
leolastimosa@gmail.com