Kahadlok ni Duterte
Human sa pila ka adlaw nga pagpakahilom, nipakita sa niaging adlaw si kanhi presidente Rodrigo Duterte sa YouTube channel ni Davao City Mayor Sebastian Duterte uban sa iyang kanhi presidential spokesman Harry Roque ug sa kanhi press secretary ni Presidente Ferdinand Marcos Jr. nga si Trixie Cruz-Angeles nga nangadto sa Davao atol sa nagpadayong Kadayawan Festival.
Wala kong kahuman sa kapin sa oras nilang programa. Kay gawas nga wala silay bag-ong isyung natuki, nabatyagan nako nga dili na sama kabug-at ang iyang sulti, bisan sa naandang mga hudlat ug balikas.
* * *
Daotang balita para sa kampo sa mga Duterte, mahimong wala ko mag-inusara. Resulta sa nasudnong surveys nga sa nangaging katuigan nimatuod sa talagsaong popularidad sa kanhi presidente karong bag-o nipakita na sa inanay nga paghiyos sa gidaghanon sa ilang mga dumadapig.
Ang rason? Wala na siya sa gahom. Makalibog niyang mga istorya gitun-an unsay ipasabot kay nagtungkawo pa man sa Malacañang. Bisan unsay sulti niadto dunay implikasyon sa katawhan kay siyay labing gamhanang opisyal sa nasud. Karon, wala nay ganahan nga magsusi, sayon rang isalikway nga nagpataka ug nagsalimuang.
* * *
Gawas pa, dili kang kapaabot og kamatuoran sa liku-liko niyang mga tubag sa bisan unsa, kay puno sa daghang sapaw sa mga pasumbingay ug pa-goryo-goryo ug pagpaburot sa kangilngig sa iyang kahapon.
Tambag sa mga nakaila niya: Kon gusto kang molili sa tinuod niyang panghunahuna, subaya ang mga sulti sa iyang mga sinaligan, labi na silang Senador Bato dela Rosa ug iyang mga anak nga silang Bise Presidente Sara, Kongresista Paolo, ug Mayor Baste.
* * *
Kon mao, ilang mga mensahe sa nangaging mga adlaw nagbutyag sa:
• Kahadlok ni Duterte sa nag-ung-ong nga arrest warrants sa International Criminal Court (ICC) ug mas agresibong operasyon pagdakop ni Apollo Quiboloy;
• Desperadong pagpangita og mga isyu nga ikalabay sa Malacañang (nakapait mao nga kasagaran nisumbalik sa nangalisbo niyang mga transaksiyon, sama sa kawat sa Philippine Health Insurance Corp., Pharmally scandal ug ka-inutil pagsulbad sa baha); ug
• Pagpamugos pagbuhi sa bahaw niyang pasangil nga adik sa cocaine si Marcos Jr. nga tungod sa kakuwang sa klarong mga ebidensiya ila na lang mga trolls ug si Kongresista Paolo ang naghisgot.
- Latest
![](https://www.philstar.com/images/stand-in-photo-male.jpg)
![](https://www.philstar.com/images/stand-in-photo-male.jpg)