Makabungog ang kahilom ni Cebu Archbishop Jose Palma sa pagpamugos sa National Museum of the Philippines (NMP) pagtipig sa pulpit panels sa Archdiocesan Shrine of Patrocinio de Maria Santissima sa Boljoon. Wa siya motingog bisan giisnab ang iyang awhag nga ibalik sa labing daling panahon ang kabtangan nga gikawat gikan sa parokya kapin sa 40 ka tuig na ang nilabay.
Ambot nganong wa na dasoni ang gihangop pag-ayo nga opisyal niyang pamahayag sa Pebrero karong tuiga, pila ka adlaw human gipahibawo sa NMP nga nadawat nilang pulpit panels isip donasyon.
***
Labawng makapahibung ang pagtak-om sa arsobispo sa pag-insistir ni Director General Jeremy Barns sa interview sa peryodistang si Max Limpag nga ang NMP maoy tinuod nga tag-iya sa panels. Nangangkon pa si Barns nga wa modeklarar ang arsobispo nga gikawat ang panels.
Binuang ang sulti ni Barns. Kay giklaro ni Arsobispo Palma niadtong Pebrero nga way dokumento nga magpakita nga nananghid ang pari sa Boljoon ug nga nisugot si anhing arsobispo Ricardo Kardinal Vidal sa pagbaligya sa panels. Angay unta nga gikurhian dayon sa artsidyosesis ang bakak ni Barns.
***
Bisan sa kadako ug kadinalian sa panginahanglan sa pagpasabot sa simbahan, nga mao ang tinuod nga tag-iya sa panels, mora og nakatulon og liso sa pagluom ang arsobispo. Nga wa gani bawia ang sayop sa opisyal niyang pamahayag duha ka buwan ang nilabay:
• Giila ni Arsobispo Palma si Padre Faustino Cortes nga maoy kura paruko sa Boljoon sa pagkawagtang sa panels; bisan
• Mga dokumento sa korte (nga nabasahan ni Max Limpag) nagbutyag nga ang gisundan ni Cortes, si anhing Padre Miguel Ortega, ang giila sa affidavit ni Msgr. Constantino Batoctoy nga maoy kura nga nangawat.
***
Laing santako ni Barns nga angayng tubagon ni Arsobispo Palma: Daghang pari sa Simbahang Katoliko ang namaligya sa kabtangan sa simbahan sa nangaging katuigan hangtod karon.
Mao ba ni rason sa pagpakahilom sa arsobispo? Kay nahadlok nga ang pag-utingkay sa kawat sa Boljoon makapabisto sa samang kawat sa ubang mga parokya? Ug bisan sa kasihag sa liderato ni Pope Francis, si Arsobispo Palma mahimong nagtuo pa nga ang pagtago, di ang pagsulti sa tinuod, maoy makaluwas sa simbahan gikan sa eskandalo.