Panglimpiyo sa kapolisan

Moabot dayon sa 131 ka badlongon nga polis ang gitangtang sa ilang pagkapolis tungod sa nagkalain-laing hinungdan sa una lamang 45 ka adlaw sa tuig 2024 o gikan sa Enero 1 ngadto sa Pebrero 14.

Gitug-an sa tigpamaba sa kapolisan sa nasud nga si Kolonel Jean Fajardo nga 62 sa 131 ka mga polis nga gitang-tang nag-AWOL o nag-absent nga walay pananghid samtang ang uban napamatud-an nga sad-an sa mga kasong pagpanulis, ginadili nga drugas, obstruction of justice ug conduct unbecoming of a police officer.

Sa miaging tuig, gitaho sa kapolisan nga sobra sa 3,900 ka mga polis ang gisilotan tungod sa mga kasong administratiba gikan sa buwan sa Hulyo 1, 2022 hangtod sa Enero 3, 2024. Gitug-an sa kapolisan nga kining maong gidaghanon anaa kini sa 1.7 porsiyento sa kinatibokang 232,000 ka mga sakop sa kapolisan lukop nasud.

Sa 3,900 ka mga polis, 985 kanila ang gitang-tang, 230 ang gi-demote ug 1, 701 ang gipangsuspenso. Dugang pa, 694 ka mga polis ang gi-reprimand, 109 ang wala hatagi sa ilang benipisyo, 134 ang wala hatagi sa ilang suweldo ug 79 ang wala pagawsa sa ilang kampo.

Bisan og wala makaabot og duha ka porsiyento sa 232,000 ka mga sakop sa kapolisan lukop nasud ang napamatud-an nga nagpabadlong, dili pa mahimo niining kampante ang kinatibuk-ang liderato sa organisasyon sa kapolisan tungod kay wala pa maapil sa kuwentada ang mga kaso nga padayon pang gidungog sa mga ahensiya o opisina nga pang administratiba.

Hinuon maayo kini nga tilimad-on alang sa padayon nga paglimpiyo sa liderato sa kapolisan sa ilang organisasyon.

Dili ikalimod nga sa matag organisasyon aduna gayoy buangon o badlungon. Lisod o dili sayon nga sudlon ang organisasyon sa kapolisan pero bisan pa man niini nganong aduna man mga polis nga magpabadlong?