Ginoo alang

Maayong balita

Nahasol si Herodes ingon man ang iyang mga dumadapig. Kini tungod kay dunay mga dumuduong nga maalamon kaayo sa mga bitoon ang nangabot ug nagpangutana kun asa dapita nahimugso ang Hari sa mga hari. Bisan pa man sa kahasol si Herodes (The Great) ang mibuot nga pangitaon ang bata aron kunohay siya mosimba kaniya. Apan ang maong tinguha pagtakuban lamang. Kini tungod kay ang maong pagsugo pangandam lamang ni Herodes sa usa ka dautang lakang nga mao ang pagpamatay sa mga Santos Inocentes. Kini tungod kay si Herodes nasuko nga gilansisan siya sa mga dumuduong.

Kasinatian

Ang tulo ka mga dumduong gitawag pud nga mga mago. Ang pulong mago gikan sa pulong MAGUS kun maalamon. Nihalad sila sa Batang Jesus og bulawan, insenso ug mira. Kun maghisgot kita sa maong mga gasa, ang dunay tataw nga bili diha sa salapi mao man ang bulawan ang laing duha ka mga gasa, ang maisip natong mga simbolo lamang.

1. Ang Bulawan nisimbolo sa pagkahari ni Kristo Jesus

2. Ang Incenso nisimbolo sa iyang pagkapari. Ang insenso gamiton sa pag-ampo.

3. Ang Mira nisimbolo sa kapaitan nga pagaantuson didto sa balabag sa Krus sa atong Ginoo. Butang nga niabot gyud sa iyang kinabuhi.

Lihok

Nindot man nga dunay interreligious dialogue ingon man ecumenism apan kinahananglan nga dunay boundaries ang tanan. Lisud na kaayo nga mag mixed up ug mamahimong saksak sinagol. Hinuon mao kini ang nahitabo ning mga panahona tungod ug alang sa gitawag nilang malangkobong panaw padulong sa kaluwasan. Dios siya alang sa tanan apan dili tanan ang nidawat kaniya. Diod siya alang sa tanan kun ang matag tawo motahud ug mosimba kaniya. Managlahi man ang kultura ug tinuohan unta mamahimo kitang mausa diha sa paghigugma. Ang paghigugma maoy makahatag kanato og kinabuhi. Ut Unum Sint nga unta mamahimong usa ang Tanan!

Pangamuyo

Ginoong Dios namo, sayud kami nga damgo mo nga mahiusa ang tanan. Himoa nga mahimo kaming usa taliwala sa among kalaihan. Unta maantigo kaming motahud sa maong kamatuoran nga managlahi kami apan gihiusa tungod sa gugma. Kini among gipangayo sa ngalan ni Jesus among Ginoo ug Hari hangtud sa kahangturan. Amen.