Mora’g way group chat silang Cebu City Mayor Mike Rama ug ang iyang mga alyado sa Cebu City Council. Kay bisan kapila balik-balika ni Rama nga P35,000 ang Christmas bonus sa mga trabahante sa City Hall, P20,000 ray giaprobahan sa mga konsehal.
O tingali gitinuod gyong Rama ang taas niyang bakasyon sa Australia. Nga wa siya makigsulti sa mga konsehal sa pagpasar sa bonus. O ang mga konsehal nagtuo nga way klaro ang sulti sa mayor. Unsa na kaha ka-grabe ang kaguliyang kon managlahi pa sila og partido.
* * *
O tingali mao na ni ang Singapore-like nga liderato ni Rama. Wa hinuon ta mahibawo diin nga Singapore niya nakopya ang pagduma sa syudad pinaagi sa pinakatay nga mga diskurso ug way kinutobang interviews sa iya ra sang mga turutot sa City Hall.
Mao nga bisan ang iyang kaugalingong mga alyado–apil ang mga konsehal ug department heads–nga wa nang kasubay unsay labing uwahi niyang sulti sa Facebook ug sa mainstream media, o unsay ipasabot sa daghang liku-liko nga gipakapinan og mga kanta, naglibog na unsa ang tinuod niyang baruganan.
* * *
Nibiya si Rama niadtong Oktubre 31 nga nagkayamukat ang liderato sa Metro Cebu Water District (MCWD) nga hangtod karon giilogan sa grupo ni kanhi konsehal Joey Daluz ug sa iyang mga tinudlo nga gipangulohan ni Heneral Melquiades Feliciano.
Nibalik siya karong semanaha nga ang bonus sa City Hall pabiling lubog. Ganahan gyod tingali og katag kay wa say klaro ang plano nga mag-abot sa Australia ang tibuok niyang pamilya maong giinat ang usa ka buwan ra untang bakasyon.
* * *
Sa di pang kapanghambog si Rama nga ang iyang bonus sa City Hall maoy kinadak-an, gipalabwan siya sa Cebu Provincial Board nga way bisan gamayng kalibog nga niaprobar sa P40,000 nga pinaskohan sa tanang trabahante sa Kapitolyo.
Ang puhalay sa bonus sa mga politiko sa syudad ug probinsiya niresulta sa higanteng kalibog sa Sugbuanong mga magbubuhis: Nganong abunda man ang kuwarta kon bonus nay hisgutan pero kanunay mang mobalibad nga way kuwarta kon paninglan na og sulbad sa nanggungis na nga mga problema sa baha, basura, libaong, trabaho, panginabuhi, pinuy-anan, kahimsog ug edukasyon?