Kayamukat sa ayuda

Gitakdang ipagawas sunod semana ang ?3 bilyones nga fuel subsidy para sa mga drayber sa mga sakyanang pamasahero tungod sa sunudsunod nga pagsaka sa presyo sa mga produkto sa lana. Sa niaging duha ka sunudsunod nga semana lang, ?7.50 kada litro na ang uminto sa krudo nga maoy gigamit sa kasagaran sa public utility vehicles (PUVs).

Pero gamiton gihapon ang samang kuwestiyonable nga mga lagda sa nangagi nga pagpanghatag sa fuel subsidy: Di direktang ihatag ang ayuda ngadto sa mga drayber; ipaagi lang gihapon sa operators ug mga politiko, bisan sa mga pasangil nga wa moabot sa labing tabanganan nga mga drayber.

* * *

Nipahibawo ang Land Transportation Franchising and Regulatory Board (LTFRB) nga ?2.95 bilyones ang luwatan sa Department of Budget and Management (DBM) sunod semana kon may certification na sa Department of Energy (DOE) nga kapin sa $80 kada baril ang presyo sa lana sa world market sa niaging tulo ka buwan. 1.6 milyones ka PUV drivers ang makadawat:

• 280,000 ka PUV drivers (ipaagi sa operators), ?10,000 kada usa sa mga drayber sa Modern Public Utility Jeepney (MPUJ) ug Modern UV Express (MUVE), ug ?6,500 kada usa sa mga drayber traditional jeepneys;

• 930,000 ka tricycle drivers (ipaagi sa Department of Interior and Local Government) nga makadawat og ?1,000 kada usa; ug

• 150,000 ka delivery service riders ug habal-habal drivers (ipaagi sa Department of Information and Communications Technology ug Department of Trade and Industry) nga makadawat og ?1,200 kada usa.

* * *

Managlahi sab ang mga paagi sa pagkuha sa tabang:

• Pinaagi sa e-wallet accounts ug bank accounts;

• Pantawid Pamilyang Pilipino Program (4Ps) card; ug

• Over-the-counter withdrawal sa Land Bank of the Philippines.

* * *

Sa papel, hapsay ang pagpanghatag sa fuel subsidy. Pero kay wa man usba ang mga lagda, gikabalak-an nga gikahadlokan nga masubli ang naandang kayamukat:

• Operators gipasanginlang nibolsa sa ayuda para sa mga drayber, samtang ubang operators wa kadawat kay ang prangkisa naa pa sa ngan sa ilang gipalitan; ug

• Way klarong listahan sa mga makadawat tungod sa kadaghan sa mga ahensiya ug mga politiko nga nag-andam, gawas nga kuwestiyonable ang sukaranan sa pagpili sa beneficiaries.