Nganong mas sayo nga na-ampaw
Nabara ang trapiko samtang nagsubay mi sa highway buyon sa Mactan Export Zone sa niaging buntag. Kaingon nako nga dunay aksidente sa unahan. O, sama sa naandan, nakatsamba mi sa naandan nga pagkamang sa trapiko sa Lapu-Lapu City.
Way aksidente sa unahan. Di sab mas daghan kay sa naandan ang mga sakyanan. Gidugkal diay ang kabahin sa dalan. Usa ra ka lane ang maagian sa kada direksiyon. Sementado ang dalan. Na-semento atol sa administrasyon ni kanhi mayor Paz Radaza. Wa pay unom ka tuig ang nilabay. Nganong gi-semento na man sab?
***
Wa ko kahibawo sa aktuwal nga kahimtang sa dalan sa wa pa gub-a. Si Lapu-Lapu City Mayor Ahong Chan, kon makahigayon bisan sa busy sa niyang schedule sa TikTok ug wangwang, maoy makapasabot kon angay na bang gub-on ug ayuhon ang bag-o pa lang na-semento nga kadalanan sa Opon.
Di hinuon mga motorista ray nahibung nga gibuslotan ang maayong mga dalan samtang gipasagdan ang dugay nang mga libaong. May mga mayor nga nireklamo sa Department of Public Works and Highways (DPWH) nga giguba ang bag-o pa nilang kadalanan.
***
Dunay katin-awan ang among kaila nga kanhi opisyal sa DPWH:
• Duna silay listahan sa schedule sa pag-ayo sa nasudnong kadalanan;
• Gihimo ang listahan sa way pagsusi sa aktuwal nga kahimtang sa kadalanan;
• Gi-subasta ang proyekto ug gipatuman ang pag-ayo sa kadalanan sa way pagkonsulta sa lokal nga mga opisyal ug pagtan-aw sa kahimtang sa kadalanan;
• Bisan mahibulong ang mga kontraktor nganong gub-on ang maayong dalan, kinsa man silang mokuwestiyon sa minilyon ka pesos nga proyekto nga ilang nadaog?
***
Pipila hinuon sa mga motorista nisulti namo nga na-ampaw na ang kabahin sa dalan. Maong kinahanglan nga sementuhon pag-usab. Nga makapatumaw sa laing kahibulong: Nganong duna may kadalanan nga mas daling naampaw kay sa uban?
Duna koy sugyot nga duha ka sukaranan pagsusi sa kalidad sa imong dalan. Palihug ikumparar sa maayong pagkatrabaho nga: Nasudnong highway sa Mandaue City paingon sa Consolacion nga na-semento sa administrasyon ni anhing presidente Fidel Ramos; ug Serging Osmeña Boulevard sugod sa utlanan sa Mandaue ug Cebu City nga nahimo sa administrasyon ni anhing presidente Noynoy Aquino.
- Latest
