Giduot na, giinsulto pa
Gisulti ni Presidente Ferdinand Marcos Jr. ang tanang sakto nga mga saad sa kampanya batok sa kakabos. Gipalihok niya ang tibuok burukrasya, atol sa tigom sa National Anti-Poverty Commission (NAPC) sa Malacañang, pag-una pagtabang sa katawhan nga way tubig ug way kuryente ug nagpuyo sa mga lugar nga way kadalanan.
Sa di pa ta mopakpak, angayng hinumdoman ang usa sa labing importante nga leksiyon nga hinaot atong nakat-onan human sa usa ka tuig niya nga pagtungkawo sa Malacañang: Bisan sa tanan niyang nindot nga istorya, sukwahi ang aktuwal niyang buhat.
***
Imbes barawon ang paspas nga sulbong sa mga presyo, sama sa gihimo sa mga lider sa silingang mga nasud sa ASEAN, gilawog ni Marcos sa taas nga inflation ang katawhan, labi nang mga kabos:
•Kapakyas niya pag-import dayon sa nagnihit nga mga produkto sa agrikultura sa niaging tuig nipamahal sa sibuyas bombay (?720 kada kilo) ug asukar (?120 kada kilo); ug
•Samtang nakontrolar sa ubang nasud sa ASEAN ang kamahal sa inadlawng palaliton, ang pataka ni Marcos nipaburot sa inflation rate ngadto sa 8.7% niadtong Enero, kinatas-an sukad 2008.
***
Giisnab ni Marcos ang ?150 kada adlaw nga legislated wage increase nga giduso ni Senate President Migz Zubiri ug sa ubang niyang mga alyado. Gisugba niyang mga mamumuo sa regional wage boards nga napamatud-an sa niaging 34 ka tuig nga tua kapusta sa mga negosyante.
Gipalabi hinuon niyang Maharlika Investment Fund bill. Nga way klaro unsay kapuslanan ug asa magkuha og kuwarta. Seryuso hinuong hulga nga kurakuton ug makapa-bangkarota sa nasudnong panudlanan.
***
Di pa igo ang pagpasamot sa kaapiki sa labing kabos sa atong katawhan, gipakapinan pa g’yud ni Marcos og insulto. Pinaagi sa pagtudlo sa usa sa labing bastos sa iyang mga alyado isip adviser para sa poverty alleviation.
Bisan gi-disbar sa Korte Suprema, giduphan sa Malacañang si Larry Gadon nga maoy labing takos nga makatambag sa presidente unsaon pagtabang sa labing kabos sa katawhan. Labihan g’yud tingaling ngilngiga ni Gadon. Kay sa dakong tigom niadtong Biyernes sa Malacañang, nga gitambongan sa NAPC, DSWD, NEDA, ug ubang ahensiya sa gobyerno nga makatabang sa pagsulbad sa kakabos, wa igkita si Gadon.
- Latest
