Laing bakak sa presidente
Wa tingali nakahunghong ni Presidente Ferdinand Marcos Jr. Nga dunay laing makabati sa iyang diskurso atubangan sa iyang mga dumadapig sa Sugbo niadtong Mayo 27, 2023, human sa pag-abli sa pantalan sa Liloan. Mahimong nagtuo ang presidente nga interesado rang media sa iyang mensahe parte sa pantalan.
Mahimo ganing way sakop sa media nga nakatambong sa pakigtagbo sa iyang mga dumadapig. Nga posibleng maoy nakaaghat sa presidente sa paghimo og lahap nga deklarasyon: Nga ang ekonomiya sa Pilipinas mao na karon ang labing paspas og tubo sa tibuok kalibotan.
* * *
Gikurhian sa VERA Files ang pangangkon. Ang online news organization, gitukod sa peryodistang si Ellen Tordesillas sa 2008, mas naila sa isog nga pag-fact check sa sayop nga kasayuran. Kay sa pagpakatap og reporters pagsunud-sunod sa presidente.
Nakuha sa VERA Files ang transcript sa diskurso sa pbbm.com.ph sa Office of the President. Niang kabahin sa deklarasyon: “Sa ngayon, ‘yung ekonomiya natin dito sa Pilipinas, kasama ko lang ‘yung mga business community ng European Union at ‘yung mga iba’t ibang bansa. Tayo ngayon ang fastest growing country in the world.”
* * *
Gipakita sa VERA Files ang labing uwahing mga numero sa Asian Development Bank (ADB). Nga bisan sa Asia-Pacific region lang, ang Pilipinas ika-siyam ra sa pagtubo sa gross domestic product (GDP) sa 2022:
Una, Fiji (15.9%); ikaduha, Armenia (12.6%); ikatulo, Maldives (12.3%); ikaupat, Cook Islands (10.5%); ikalima, Georgia (10.2%); ikaunom, Malaysia (8.7%); ikapito, Tajikistan (8%); ikawalo, Vietnam (8%); ikasiyam, Philippines (7.6%); ug ikanapulo, Bangladesh (7.1%).
* * *
Sa di pa mosumbalik ang Malacañang nga mahimong bahaw nang numero sa ADB, niang mas bag-ong ranking sa International Monetary Fund (IMF) sa 16 ka labing paspas og tubo nga mga ekonomiya sa 2023:
16. Uganda (5.7%), 15. Vietnam (5.8%), 14. Cambodia (5.8%), 13. India (5.9%), 12. Philippines (6%), 11. Benin (6%), 10. Niger (6.1%), 9. Ethiopia (6.1%), 8. Rwanda (6.2%), 7. Côte D'Ivoire (6.2%), 6. Congo (6.3%), 5. Fiji (7%), 4. Maldives (7.2%), 3. Senegal (8.3%), 2. Libya (17.5%); ug 1. Guyana (37.5%).
- Latest
