Si Presidente Ferdinand Marcos Jr. morang takuri nga nitawag sa kaldero nga itom. Pagpaka aron ingnon ang iyang pagdasig sa Kapisanan ng mga Brodkaster ng Pilipinas (KBP) sa pagtudlo sa katawhan unsay tinuod atubangan sa nagbaha nga pagpamakak og fake news.
Kay nahibawo ang mga magsisibya sa gamhanang papel sa iyang makinarya sa propaganda sa paghilo sa panghunahuna sa katawhan sa bakak nga mga pangangkon sa Tallano gold, Yamashita treasure, golden years sa diktadurang Marcos, ug ?20 ang kilo sa bugas humay karon nga siya na ang nagtungkawo sa Malacañang.
***
Di kinahanglan nga motan-aw og layo ang KBP pagsubay sa nagbuntaog nga mga ebidensiya nga mga trolls ni Marcos ang naghimo sa kaliboan ka videos, images, memes, ug posts sa TikTok, YouTube ug Facebook nga ni-aleluya ni Marcos ug nipakauwaw sa iyang politikanhong mga kaatbang.
Kon sinsero si Marcos sa iyang awhag paglimpiyo sa social media, labing laktod niyang mahimo mao ang pagpapahuway sa iyang gibuhi nga troll farms. Ug pag-delete sa makahilong mga basura nga ilang gisabod sa nagkalainlaing mga plataporma sa daghan nang katuigan.
***
Mahimong magpa-goryo-goryo si Marcos sa pagbalibad nga wa siyay labot sa troll farms. Nga iya ra silang mga dumadapig nga di niya makontrolar. Kay igo lang sab nga nagpahimus sa ilang kagawasan sa pagpadayag. Bisan unsa ka-iresponsable.
Pero di kalikay si Marcos sa responsibilidad sa direktang mga lakang sa iyang administrasyon. Napu pa lang ka buwan ang iyang pamunoan pero abunda nang mga ebindesiya sa iyang pagsabotahe sa katungod sa mga magbubuhis sa pagpakisayod.
***
Pananglitan, ang iyang pagpakahilom sa gipasangil nga mga eskandalo sa iyang pamunoan. Nahikawan ang katawhan sa kahigayonan sa pagtuki sa gitumbok nga iyang kalapasan sa batakang mga lagda.
Iyang pagpakahilom sa pasangil nga iyang bayaw ang utok sa smuggling sa sibuyas ug ubang agricultural products ug nga siya ang nagpalusot sa smuggled sugar sa wa pa mapirmahi ang Sugar Order No. 6 maoy paglampornas sa transparency sa gobyerno nga iyang giawhag nga angayan nga pakigbisogan sa KBP. Lisod malabwan ang kahilas sa iyang paglusad og kampanya batok sa bakak nga iyang gipakatap ug pagsusi sa mga transaksiyon nga iyang gitabonan.