Ang imbestigasyon sa Portugal nga naka-dokumento sa pag-abuso sa kaparian sa Simbahang Katoliko og dul-an sa 5,000 ka mga bata sukad sa 1950 nadasig sa imbestigasyon sa France nga nakakaplag nga 3,000 ka mga pari ug opisyal sa simbahan ang niabuso sa 200,000 ka mga bata.
Ang resulta sa imbestigasyon sa Portugal gipagawas karong semanaha nisunod sa pagpagawas sa resulta sa imbestigasyon sa France sa Enero sa niaging tuig. Kanus-a man makaangkon og kaisog ang kadagkoan sa Simbahang Katoliko sa Pilipinas sa paglusad og samang imbestigasyon?
* * *
Ang mga imbestigasyon sa Portugal ug France nasumpay ug susama og findings sa nahauna nga mga imbestigasyon sa Australia, Germany, Ireland, ug Netherlands. Nga pulos nadasig sa sugo ni Pope Francis niadtong 2019 ngadto sa mga pari ug mga madre sa pagsumbong sa sexual abuse ug cover-ups sa ilang mga labaw.
Katorse ka tuig na human sa sugo sa Santo Papa sa kada obispo pag-angkon og responsibilidad sa katalagman nga namugna sa krisis sa sex abuse, wa pa matandog sa kusi sa ilang konsiyensiya ang kinabag-an sa kaparian sa Pilipinas.
* * *
Sa atong kaugalingong nataran sa Artsidyosesis sa Sugbo nahitabo ang usa sa labing lang-og nga eskandalo:
• Sugbuanong pari nga giapalagpot sa iyang religious order sa Estados Unidos human napamatud-i nga ni-abuso sa mga batang lalaki ug nigamit og ilegal nga drugas sa Los Angeles; pero
• Ginamit ang kadato ug koneksiyon sa iyang pamilya sa Sugbo, gihimong monsenyor ug gihatagan og dakong puwesto sa artsidyosesis ug gitugotang makatukod og mga organisasyon nga naglakip sa, nakatag-an ka, batan-ong mga lalaki.
* * *
Napugos ang Artsidyosesis sa Sugbo pagtangtang niya tungod sa sugo sa Vatican, nga nakugang pagkahibawo nga nagpadayon pa diay sa iyang pagka-pari sa Sugbo. Salamat sa influencia sa iyang pamilya, way nangahas pagbarug ni pagsusi sa mas bag-ong mga pasangil batok niya.
Hangtod sa iyang pagkamatay sa sakit duha ka tuig ang nilabay, hilom ang simbahan sa iyang mga atraso. Samang kahilom ang padayong nihabol sa law-ay ug bangis nga mga pangabuso sa ubang kaparian batok sa mga bata ug kababayen-an sa Sugbo ug sa Pilipinas. Ambot hangtod kanus-a ta nga molingiw sa pait nga kamatuoran.