Siyay nibisto sa eskandalo

Way nakahibawo nga si Bise Presidente Sara Duterte Carpio, bisan sa mas dagko niyang responsibilidad, mas daghang trabaho ug mas lagyong lakaw, mopauli g’yud sa ilang balay aron mangunay pagpakatug sa iyang mga anak.

Hangtod nga iyang giboluntaryo ang kasayuran sa Facebook. Aron tingali pagpahibawo nga iyang na-balanse ang mga obligasyon sa nasud ug pamilya. Ang iyang nataligam-an mao nga talagsaon ang iyang pribilehiyo. Daghang inahan nga bisan unsaon og paningkamot di makahunghong og tam-is nga mensahe pagpakatug sa ilang mga bata.

***

Way nakahibawo nga si Carpio gipagamit ni Presidente Ferdinand Marcos Jr. sa mga sakyanan sa 250th Presidential Airlift Wing (PAW) sa Philippine Air Force (PAF) nga gipaubos sa Presidential Security Group (PSG).

Hangtod nga iyang giboluntaryo ang kasayuran sa iyang post pagpahalipay sa birthday sa presidente niadtong Martes. Wa lang tingali kapugong sa iyang kaugalingon sa pagpasalamat sa pabor nga iyang nadawat. Ang iyang nataligam-an mao nga ang pagsangyaw sa espesyal nga pabor ug pribilehiyo nakapabisto sa higante nga pagpaka aron ingnon sa administrasyon.

***

Giawhag sa Malacañang ang katawhan nga magsakripisyo tungod sa kalisod sa ekonomiya --taas nga presyo sa palaliton, plitehan, bayranan sa tubig ug kuryente, ug abangan sa mga pinuy-anan. Gipasidan-an sa Department of Interior and Local Government ang lokal nga mga opisyal batok sa luxury vehicles.

Maong di mabasol ang mga magbubuhis nga nahimangod nga wa diay labot sa pagdaginot ang dagkong opisyal. Wa katabang ang pasalig sa PAF nga ang presidente, mga sakop sa iyang pamilya, ang bise president, ug ubang VIPs mao ray makapahimus sa mga sakyanan sa PAW.

***

Way sukaranan ang pasangil ni Carpio nga mga madinumtanon ray nidaginot sa iyang greeting. Wa mabantog sa transparency ang ilang administrasyon. Mao nga ang bisan unsang mumho sa kasayuran nga ilang isabod sa social media, nga nataligam-an paghisgot sa ilang trolls, makatabang sa katawhan pagsusi giunsa paggasto ang ilang buhis.