Presidente sa trolls
Kon gipirmahan pa lang unta ni Presidente Duterte ang SIM Card Registration bill, maibanan na kon di man hingpit nga mabadlong ang trolls. Kay puno sa pagrehistro sa tanang SIM cards, gisugo sab sa balaudnon ang pagtug-an sa tinuod nga ngan sa di pa marehistro sa bisan unsang social media accounts.
Napakyas ang Facebook, YouTube, TikTok ug ubang plataporma sa paghunong sa pagkatap sa fake news tungod sa ilang panghunaw nga di nila kapugngan ang gawasnong binayloay sa nagkasungi nga mga panghunahuna. Makatabang ang balaudnon sa pagtapak sa higanteng buslot.
* * *
Gusto sa presidente nga basahon una ang mga lagda sa pagpatuman sa di pa niya pirmahan ang balaudnon. Way nakahunghong niya nga way maumol nga implementing guidelines human sa iyang veto. Gawas lang kon sapawan ang veto sa ? nga mayoriya sa Senado ug House of Representatives.
Sa pasangil nga gipayuhot ang mga probisyon batok sa trolls, sakto si Senate Minority Leader Franklin Drilon: Giaprobahan sa Senado ang ilang bersiyon; gisagop sa House pinaagi sa bicameral conference committee; ug gi-ratify sa duha ka bay balaoranan.
* * *
Labing dakong hasol nga mamugna sa balaudnon mao nga kinahanglang magparehistro pag-usab ang tanang users sa di pa makapadayon sa paggamit sa ilang social media accounts. Kon sundon ang mga lagda sa GCash, PayMaya ug ubang online payment systems, di na silang kapamakak sa ilang ngan ug nawong:
• Ibutang ang tinuod nilang ngan ug address;
• Letratohan ang ilang nawong pinaagi sa mobile phone;
• I-upload ang ilang government ID; ug
• Tanang personal nga kasayuran panalipdan sa Data Privacy Act sa 2012.
* * *
Ang veto sa presidente di kapapas, hinunoa makapasamot, sa mga pagduda nga binayran niyang trolls ang nakakumbinser sa 16 milyones ka botante pagpili niya niadtong Mayo 2016.
Iyang veto makapasulbong sa kahadlok nga mas makapatuyang ang konsabo sa trolls nga nagpaluyo niya, nga gituohang gisuholan sa buhis sa katawhan, ug sa trolls ni kanhi Senador Ferdinand Marcos Jr. Sa pagpabaha og dugang pagpamakak, pagpangilad ug pagbinastos. Aron pagbuakbuak ug paglibog sa katawhan. Aron nga, sa makausa pa, trolls na sab ang magbuot kinsa ang mapili nga presidente karong Mayo. Nga maoy moduma sa nasud sa mosunod nga unom ka tuig.
- Latest
