Ang maayong balita mao nga dunay probisyon sa Tax Reform for Acceleration and Inclusion (TRAIN) Law ni Presidente Rodrigo Duterte nga maoy nipahamtang og excise tax sa lana nga nisugo nga suspensuhon ang pagpangolekta sa buhis kon molapas sa $80 kada baril ang presyo sa lana.
Hagbay rang nilapas sa $80 kada baril ang presyo sa lana tungod sa kanihit sa kalibotanong suplay. Nilapas na man gani sa $100 kada baril sa niaging semana tungod sa pag-atake sa Russia sa Ukraine. Nganong wa may nagtagad sa pagsuspenso sa excise tax?
* * *
Tungod sa di maayong balita: Nihupas nang ka-epektibo sa Section 43 sa TRAIN Law; nga epektibo ra sa mga tuig nga 2018, 2019 ug 2020. Maong bisan pabor si Finance Secretary Sonny Dominguez sa pagsuspenso sa buhis di mahimo kay wa nay sukaranan ang pagsuspenso sa balaod.
Dako untang maiban sa presyo sa lana kon masuspenso dayong excise tax: P6 kada litro sa krudo; P10 kada litro sa gasolina; ug P33 kada tangke nga 11 ka kilo sa liquefied petroleum gas (LPG). Wa pa ni labot sa uminto karong semanaha.
* * *
Kinahanglan nga magpanday og bag-ong balaod ang Kongreso sa pagbanhaw sa Section 43 sa TRAIN Law. Nga di mahimo kay namakasyon ang mga senador ug mga kongresista para sa politikanhong kampanya. Unya pa mobalik ang ilang sesyon liwas sa piniliay sa Mayo 9.
Mas sayo sila nga magkatapok pagbalik kon mopatawag og special session si Presidente Duterte. Nga wa mag-apura sa pagtabang sa nagbaguod nga mga motorista ug mga konsumidor. Mas nalinga sa pag-insistir nga di pa siya laos. Nga, bisan sa nabulilyaso niyang mga maniobra kinsay padaganon, siya gihapoy magbuot kinsay sunod nga presidente ug bise presidente.
* * *
Maayo na lang nga mas andam ang economic managers sa Development Budget Coordinating Committee. Nakakita nag ?3 bilyones nga hinabang sa mga drayber sa mga sakyanang pamasahero ug mga mag-uuma ug mga mangingisda:
- ?2.5 bilyones nga fuel subsidy para sa kapin sa 377,000 ka drayber sa jeepneys, UV express, taxis, tricycles, ride-hailing ug delivery services sa tibuok nasud; ug
- ?500 milyones para sa fuel discounts sa mga makinarya sa mga mag-uuma ug mga mangingisda.