Sugbo lupig sa Ormoc sa pamakuna
Kon nagkinahanglan ka og laing pahinumdom sa kasayop sa desisyon ni Cebu City Mayor Edgar Labella pagpakatug sa P400 milyones nga gigahin nilang Bise Mayor Mike Rama ug mga konsehal aron ipamalit og bakuna, palihug hibaw-i ni:
Magsugod karong semanaha ang atong silingang Ormoc City sa Leyte pagpamakuna sa general population (sa ato pa, apil nang mga bata nga 12 anyos pataas) ug gipaabot nga makaangkon nag herd immunity batok sa COVID-19 sunod buwan. Mas abunda ang ilang suplay ug mas paspas ang pagpamakuna kay namalit og ilang kaugalingong bakuna.
* * *
Kay di man sama kadato sa Cebu City, P200 milyones ray gigahin sa Ormoc sayo ning tuiga para sa bakuna. Mas unang nakapasar ang Cebu City Council sa budget sa Disyembre pa sa niaging tuig.
Laing kalainan sa duha ka siyudad mao ang ilang mga mayor. Si Labella nagsige og work from home ug, segun sa Commission on Audit, nisurender sa iyang gahom ngadtong City Administrator Floro Casas Jr. Samtang si Mayor Richard Gomez sa Ormoc mas taas og panglantaw --napangandaman ang kanihit sa suplay sa mga bakuna gikan sa nasudnong gobyerno.
* * *
Way laing mayor sa Sugbo nga sama og foresight ni Gomez. Ambot nisunod ba lang sa pagpangiyugpos sa Kapitolyo sa pagpamakuna o pareha silang Labella nga ang tinan-awan kutob ra sa tumoy sa ilong.
Ang Lapu-Lapu City Council bisan uwahi na nipasar og P104 milyones nga budget pagpamalit og mga bakuna niadtong Agosto. Pero si Mayor Ahong Chan imbes mosunod ni Gomez nikopya ni Labella sa pagpakatug sa kuwarta ug nipalabi sa iyang Tiktok.
* * *
Bisan sa gidaghanon sa mga nabakunahan na sa Metro Cebu base sa ilang target population, ang mga syudad nilang Labella ug Chan nabiyaan sa ilang mga silingan. Nag-una ang Mandaue City, ikaduha ang Minglanilla, ikatulo ang Naga City, ikaupat rang Cebu City ug ikalima rang Lapu-Lapu.
Ang konsuylo maong pasalig ni vaccine czar Carlito Galvez nga magsugod nang pamakuna sa mga bata ug general population sa tibuok nasud sa Oktubre kay mangabot nang dugang 54 milyones ka doses sa mga bakuna. Ang bad news mao nga mas daghang pasalig si Galvez sa bakuna nga napakyas kay sa natuman.
- Latest
