Sambingay sa elepante ug mga ilaga

Unang bahin: May upat ka ilaga nga naghuot sa usa ka lawak. Ang unang ilaga nibasol sa ilang kadagko. Ang ikaduha nitulisok sa kapakyas nila pagtukod og mas dakong bay. Ang ikatulo nitumbok nga nisamot ang kahuot kay pulos sila wa mangaligo.

Ang ikaupat nga ilaga maoy nipasabot sa ilang kahimtang --may elepante sa lawak nga maoy tinuod nga nakapahuot nila. Apan way mahimo kay gamayng lihok sa elepante mangapislat sila. O kon masuko, maguba ang tibuok bay. Ang kamapangahason sa ikaupat nga ilaga maoy makapa-alaot niya sa pagpadayon ning atong sugilanon.

* * *

Ikaduhang bahin: Ang unang ilaga nipasalig paghatag og pagtugot sa ikaupat bisan di pa malab-as sa ikaduhang ilaga ang lisensiya. Ang ikatulo andam nga mohatag sa lisensiya apan mag-agad sa ikaduha.

Hangtod nga niabot ang gikahadlokang adlaw. Gidid-an ang ikaupat nga ilaga nga manginabuhi. Nagtinulisokay ang tulo ka ilaga: Ang una nibasol sa kapakyas sa ikaduha sa paghatag og lisensiya; ang ikatulo nibasol sa una ug ikaduha; apan ang ikaupat rang ilaga ang nakatugkad nga ang tinuod nga hinungdan sa iyang gidangatan mao ang elepante sa lawak.

* * *

Ikatulong bahin: Yano rang reklamo sa elepante --wa katuman ang ikaupat nga ilaga sa ilang kasabutan. Busa nanganti nga babagan niyang bag-ong lisensiya. Nanghudlat nga di ma-inutil g’yung ikaupat samtang siya pay hawod.

Ug labihang hawora sa elepante sa iyang gingharian. Tanan niyang gusto matuman. Apan gikabalak-an nga siya mismo wa makaseguro unsay gusto. Sa usa ka higayon gipasaligan ang ikaupat nga ilaga nga makapadayon kon mopaluyo sa federalismo. Sa laing higayon gipasaylo na sa atraso. Apan wa badlonga ang ikalimang ilaga nga nihudlat sa una ug nisapaw sa ikaduha ug ikatulo.

* * *

Ikaupat nga bahin: Unsay dag-anan sa ikaupat nga ilaga sa kalibogang elepante ug sa ubang mga ilaga nga talawang mosukwahi niya? Ari mosud ang tinuod nga bida sa atong sugilanon --ang tag-iya sa elepante.

Nga makahimo pagbira niya gikan sa lawak nga wa siyay labot aron dad-on sa mas dakong hawan nga mas dinaliang mga gimbuhaton: Pagluwas sa mga pasyenteng nahulga sa misteryusong kagaw ug sa minilyon ka mamumuo nga nawad-an og trabaho ug pagpatabang sa ikaupat ug sa tanang ilaga sa pagpanalipod sa naapiki niyang gingharian.