Manira sa 25 ka nasud
Gitun-an karon ang pag-apil sa Taiwan sa mga dapit nga pahamtangan og travel ban tungod sa padayong pagsulbong sa mga kaso sa Wuhan coronavirus. Ambot diin gikan ning sugyota apan may sukaranan ang pagduda nga lain ning ebidensiya sa kamaikugon sa pamunoan ni Presidente Rodrigo Duterte sa China.
Kay bisan sa nangagi pang mga pamunoan ang Pilipinas naghupot na sa one-China policy. Tungod sa pamugos sa China, wa ilha sa Pilipinas nga independenteng nasud ang Taiwan. Maong inay embahada nagtukod lang ta og Taipei Economic and Cultural Office (TECO).
* * *
Apan angayng mamalandong ang presidente una ilumpong ang Taiwan sa China aron lang pagtila sa lapalapa ni Presidente Xi Jinping. Sa labing uwahing ihap, 150,000 ka Pilipinhon ang legal nga nagtrabaho sa Taiwan. Kon i-apil ang mga ilegal nga nagtrabaho, gibanabanang moabot og 200,000 ka Pilipinhon sa Taipei ug kasilinganang mga dapit.
Gawas nga mahulga ang panginabuhi sa OFWs, mangasuko sab ang mas daghang Pilipinhong mga turista nga nakapalit og mga tiket sa ayroplano ug nakabayad og mga hotel pagpahimus sa pagpapas sa Taiwan sa panginahanglan sa visa.
* * *
Laing hinungdan nga di makiangayon ang paglumpong sa Taiwan sa China--ikapito ra siya sa listahan sa padaghanay sa mga kaso sa Wuhan coronavirus:
Ang China may 40,171 ka kaso ug 908 nga nangamatay; ikaduha ang Japan nga may 156 ka kaso; ikatulo ang Singapore nga may 43 ka kaso; Ikaupat ang Hong Kong nga may 36 ka kaso ug usa ka patay; ikalima ang Thailand nga may 32 ka kaso; ika-unom ang South Korea nga may 27 ka kaso; ug ikapito ang Taiwan ug Malaysia nga may tag-18 ka kaso.
* * *
Kon ang kabalaka nga matakdan ta sa mga naigo sa Wuhan coronavirus ang sukaranan sa pagpalapad sa travel ban, mapugos sab diay ta og babag sa langyawng mga pasahero nga nakaagi o nakaduaw sa Japan, Singapore, Thailand, South Korea, ug Malaysia.
Kon manira na man lang g’yud sa mga nasud nga nasudlan sa kagaw, ipahamtang sang travel ban batok sa Estados Unidos, Canada, Britanya, Pransiya, Espanya, Italya, Belgium, Germany, Australia, Russia, United Arab Emirates, Vietnam, Cambodia, India, Finland, Sweden, Nepal, ug Sri Lanka.
- Latest
