Tinuod ba ang mga numero sa mga natakdan ug nangamatay sa Wuhan coronavirus nga gipagawas sa National Health Commission sa China matag adlaw? O may sukaranan bang pagduda nga gipahiyos ni China President Xi Jinping ang aktuwal nga pagkatap sa kagaw sa Wuhan ug kasilinganang mga dakbayan ug lalawigan?
Mao ni gipanghinaot nga sa kataposan mahibaw-an na kon mahinayon ang pagpada sa World Health Organization (WHO) og mga eksperto, nga gilaomang maglakip sa taga Centers for Disease Control and Prevention (CDC) sa Estados Unidos, ngadto sa China karon o ugmang adlawa.
***
Labihan kamabinantayon sa paniid sa WHO sa padayon nga pagsulbong sa mga kaso sa Wuhan coronavirus sa mainland China ug sa laing 28 ka nasud ug teritoryo: Nihinay nang pagkatap sa kagaw sa niaging semana apan di pa matino pila ang aktuwal nga mga kaso sud sa China, labi na sa Wuhan City ug Hubei province.
Giklaro sa WHO nga wa nila dudahi ang ihap sa China. Apan mahimong mas daghan ang aktuwal nga mga kaso kay ang pag-atiman inay pag-ihap maoy angayng palabihon sa kadaghan sa mga pasyente.
***
Ang mosunod maoy mga timaan nga nakita sa WHO nga mahimong nakontrolar nang misteryusong kagaw:
•8% na lay usbaw sa mga kaso niadtong Sabado, Pebrero 8;
•Mas ubos kay sa 11% niadtong Huwebes ug Biyernes, Pebrero 6 ug 7;
•Mas ubos pa g’yud kay sa 19% niadtong Pebrero 2, 3 ug 4; ug
•Labihan nang gamaya kon itandi sa labing dakong sulbong sa mga kaso niadtong Enero 27 nga niabot og 63%.
***
Ebidensiya sa gikabalak-an sa WHO nga pag-usab-usab sa inadlaw nga mga numero mao ang pagsaka sa death rate gahapon ngadto sa 2.2% human nitibugsok ngadto sa 1.9% niadtong Huwebes, Pebrero 6. Makadasig hinuon ang padayong pagsaka sa gidaghanon sa mga nakalingkawas sa kagaw, 7% gahapon, mas taas sa 4% niadtong Huwebes.
Laing hubad sa mga eksperto sa WHO sa mga numero nga ilang nakuha matag adlaw gikan sa China: 82% sa mga natakdan naghupot og mild symptoms (dako ang kahigayonan nga maluwas); 15% ang seryuso ang kahimtang (severe condition); ug 3% ang tandugon ang kahimtang (critical condition).