Tungod sa grabeng kahuot sa trapiko, nakahukom mi sa akong asawa nga di manggawas sa bay sugod karong semanaha. Gibalibaran ang tanang imbitasyon gawas lang sa mga duol rang gipahigayonan. Apan wa kalikayi ang ubang dinalian nga mga lakaw.
Kay di man mahimong magtanggong sa bay, nidangop ko sa sunod nga kinakusgan nga alkontra sa trapiko, ang pagbaktas. Gawas nga makalingkawas sa nangalisbo nga helmet sa mga habal-habal, di sab maapil og katanggong sa nagkamang nga mga sakyanan. Nakapasalamat kong di na sama kaalimuot tungod sa pag-abot sa bugnaw’ng Amihan.
***
Apan ang akong pagbaktas wa kalingkawas sa pagsuway sa kinaiyahan. Kay sa nangaging mga adlaw nagtultol ang uwan atol sa akong pagbaktas paingon sa akong gialagarang sibyaanan o sa pagpauli sa among pinuy-anan.
Magsige ko og awhag sa mga tigpaminaw sa Arangkada sa dyAB Abante Pa, Bisaya! sa di pagkalimot sa payong ug ubang pandong kay tingali og maatlan og uwan sa dan. Apan hasolan kong may bitbiton. Kay wa may pandong nga masud sa bolsa maghayon kong magbaktas uban ang pangaliya nga di lang unta matsambahan og uwan.
***
Wa lang ko matsambahi matag adlaw, kusog ug dugay g’yung bunok sa uwan ang nibalda sa akong mga baktas. May mga higayon pa nga motuang ang uwan og kadiyot aron lang mobundak pag-usab og mas kusog ug mas dugay pa.
Maong pagka sunod adlaw, nagbitbit ko og pandong. Niabot ko sa sibyaanan ug nabalik sa pinuy-anan nga way bisan gamay na lang talisik. Dihang wa na say pandong, nibundak na sang uwan.
***
Samtang nagbagulbol ang mga drayber ug mga pasahero sa habal-habal nga gikauban og pasilong sa skywalk sa Consolacion sa niaging gabii, akong naamguhan nga bisan sa ka-abante sa mga teknolohiya sa pagbanabana sa kahimtang sa panahon ug pagpasidaan sa katawhan sa umaabot nga mga bagyo ug ubang katalagman di gihapon nato magawongan ang kinaiyahan.
Bugtong natong mahimo mao ang pagpaundayon, inay pagbatok, sa kinaiyahan. Ipahaom inay ipabangga sa wa paabuta niyang kausaban ang atong kalihokan. Makatabang kon ato siyang palambuon, inay panamastamasan. Itahan ang naandan pagpamasin ug gaksong panginahanglan sa makanunayong pagpangandam. Magsakay man o magbaktas. leo_lastimosa@abs-cbn.com